Shillong, K’lyngkot 18 : U Myntri Rangbah ka Jylla Conrad K Sangma ula pyntip ia ka jingkiew shaphrang ka Jylla ha ka jingtreikam ka kor Internet bad ong ba haduh 90% ki jaka ha Jylla kila ioh ia ka 4G network.
Hynrei, ula kubur ba ki dang don ki jaka kibym pat biang, ha kaba ka jingtreikam ka internet kam pat long kaba biang.
“Ngi la iatreilang bad ka Sorkar India ban weng ia kine ki jingeh” ong u Conrad haba iakren bad ki nongthoh khubor shabar jong ka Cabinet Retreat ba 3, ba pynlong ha Mawkasiang hynne ka sngi Saitjain.
Ula ai nuksa ia ka jingeh ha ka liang ka jingai bording kaba ktah ia ki telecom tower, kaba la lah ban pynbeit ha ka jingialang bad ka MeECL lem bad ki Ophisar ka Tnad Bording.
U Myntri Rangbah ula ban jur ia ka jingkongsan ka jingpyniasoh da ki optical fibre, haba pynpaw ba ka Sorkar ka don jingthmu ban pyndonkam ia ki tower ka MeECL bad ki nar post elektrik ban ai ia ka kor internet sha ki shnong ba khatduh eh ha ki District, Block nalor ki skul, ki Ophis Sorkar hapoh ka arsnem.
Halor ka kam sengkam, u Conrad ula ong ba ka PRIME Prokram kala iarap ia palat 5000 ngut ki nongsengkam bad ka Sorkar ka don jingthmu ban nang pynbun shuh shuh.
