Shillong, Jylliew 09 : Ka Khasi Jaintia Fish Wholesaler and Retailer Association (KJFWRA), kala dawa ia ka Commissioner of Food Safety Kong R.M.Kurbah ba kan pynshai mynno bad hangno ba ka Tnad ka phah leh Test, ka ba pynshisha ba ki dohkha ba wanrah nabar ka Jylla ki dei kiba injek formalin.
Kane ka sur kala mih na ka jingialang ba kyrkieh jong kane ka seng ki Nongdie Dohkha bad ki nongdie dohkha kaba long hynne ka sngi Thohdieng ha Iewduh.
Kat kum ka hukum, ka Commissioner of Food Safety ka la ong, ka jingtip kala poi sha ka Ophis jong ka Commissioner of Food Safety ba na ki 40 tylli ki dohkha bala leh test, haduh 30 tylli ki dei kiba la test positive ba injek ia ka dawai formalin.
Ka ong ba kane ka long kat kum ka analysis report jong ka Assistant Food Analyst ka Sorkar Jylla kat kum ka Report No. SFTL/FW/2023-24/283-312 ba 6 tarik Jylliew, ba ong baka jing injek Formalin ka dei kaba long bih kaba khlain bor bad ba ktah jur ia ka koit ka khiah.
Ka Commissioner kala ong ba ka jingkhaii, jingbuh bad jingdie ia ki dohkha bala injek da ka formalin lane kino kino ki dawai ba iada ia ka jingpyut, ka dei ka bym shngain satia ia ka koit ka khiah kat kum ka kyndon 3(1)(zz)(v) jong ka Food Safety and Standard Act, 2006.
Halor kane, kala khang ban shalan bad die ia ka dokha ba wanrah nabar ka Jylla haduh 15 sngi ha Jylla haba buh kyndon ruh ba kiba ialeh pyrshah kin ngat ha ka jingpynsajia ba 7 snem ha phatok bad ka kun aba T. 10 lak.
Ka KJFWRA ka dawa ia ka Commission of Food Safety ba kan pynshai naei ba ki ioh ban test ia kita ki dohkha kiba lap formalin.
Kane ka seng kala kdew ba ki dohkha kiba wan sha Jylla ki dei kiba wan na kylleng ki kompani na Andhra Pradesh bad ia kine ki dohkha la ioh syrnot ruh na ka Sorkar Andhra Pradesh ba pynshisha ba kim dei satia kiba la injek formalin.
Namar kane, kane ka Seng bad ki nongdie dohkha kila rai ban leit iakynduh ia ka Commissioner of Food Safety mynta ka sngi ban ioh ia ka jingshai kaba bniah.
