Shillong, Rymphang 02 : U National Vice President ka NPP bad Symbud Myntri Rangbah ka jylla Bah Prestone Tyngsong ula iathuh ba ki bor pyniaid jong ka seng kila kyndit halor ka jingphet seng syndet jong u Lamphang barim ka jylla u MM Danggo bad ban pyniasoh noh ialade bad ka seng BJP.
“Ngi la kyndit ba ula leit ban rung noh sha ka seng BJP, hynrei ngim lah ban leh eiei ne ban ong eiei. Kan shong ha u ban shim ia ka rai” on u Bah Prestone Tynsong.
Ula ong, shen ka NPP kan sa shim ia ka rai la kan pynieng ne kan ym pynieng kyrtong shuh napoh ka Ranikor Constituency haka Elekshon MLA.
Lah ban kdew ba u MM Danngo udei u kyrtong ka seng NPP hynrei ula mih noh na kane ka seng bad ula pyniasoh noh bad ka BJP ha ka sngi Balang.
“U Myntri Rangbah, ma nga bad u bah Sniawbhalang ngin sa ia shong pyrkhat mynta ka miet bad ngin sa shim ia ka rai kaba biang” ong u Bah Prestone.
Katkum ki khubor kiba la saphriang, ki nongkyrshan ka NPP ha Ranikor ki kwah ba ka seng kadei ban pynieng ia u Bah Kitboklang Nongrem ne ia u Nelbi Sangma haka elekshon MLA na Ranikor hadien ba u Danggo ula phet noh naka seng.
Halor ka jingkylli ba ka BJP ka sdang ban khroh ia ki kyrtong ka NPP, une u nongialam ka NPP ula ong, kane ka dei ka kam politik ia kaba ym lah ban ong eiei.
“Ha ka khyllipmat jong ka jingshim rai ban pyniasoh bad kano kano ka seng ka long kaba donkam ban wad bniah bha nalade bad yn sa lah ban leit pyniaosh bad kawei patka seng” ong u Bah Prestone.
Lah ban ong, u MM Danngo ula shet kylla arsien iaka seng NPP, kata ka long hadien ba ula rem iaka elekshon shiteng samoi na Ranikor ha u 2018 ula mih noh naka NPP bad mynta sa tang shi bnai ban sdang ka elekshon ula phet biang na kane ka seng.
“Ngam lah ban ong eiei na ka bynta ka jongu, hynrei kan bha shibun lada kylli hi na u, kaei kaba la pynlong ba yn leit pyniasoh sha ka seng BJP ha ka minit kaba khatduh” la pynkut u Bah Prestone.
