Nongpoh, Jylliew 11 : Ki Pulit ka Ri-Bhoi District, kila ioh kyndang ia ka “Sleeper Cell” jong ka seng Hynniewtrep National Liberation Council (HNLC) ha Ri-Bhoi bad ioh kem ia lai ngut ki briew kiba kynnoh donkti ha ka jingsam shithi dawa pisa sha ki Hehspah hapoh ka District.
Ha ka kyrwoh bala pyllait da u Superintendent of Police (SP) Jagpal Singh Dhanoa, la pyntip ba kane ka jingioh kyndang ia ka “Sleeper Cell” kala wan jia hadien ka jingtohkit ia ka jingjur ka jingsam shithi dawa pisa jong ka HNLC sha kiba bun ki riew shimet hapoh ka District.
U pyntip ba kane ka “Sleeper Cell” ka dei kaba treikam ha Mawhati-Umroi jong ka Ri-Bhoi District bad ha Nongbah Shillong.
Une u Heh Pulit u iathuh ba ia kane ka “Sleeper Cell” jong ka HNLC la khlieh da uwei u Nongialam bala rim bha jong ka Seng uba la tip kyrteng kum u Cyfrank Paul Pariat uba dei na shnong Ummat. U iathuh ba une u dkhot ka HNLC lem bad ka kynhun jong u, kila leit sam shithi dawa pisa ha ka kyrteng ka HNLC bad byrngem ruh ia bun ki briew ba kin siew ia ka pisa lem kumta kin shah leh da kaba tyngeh.
U Jagpal ula pyntip ruh, ba halor ka jingioh ia ki jingtip ia ka jaka ba don kine ki briew, ha ka 10 tarik Jylliew, ka kynhun Special team na Police Headquarter bad ki Pulit Ri-Bhoi, kila pynlong ia ka jingkhynra bad kila ioh ban kyndang ia kane ka Cell bad kem ruh ia lain gut ki briew.
Kine ki laingut ki dei u Cyfrank Paul Pariat ba 25 snem na Ummat uba dei u Commander ka HNLC, u Kitbok Mujai ba 23 snem na Ummat bad u Barnabas Lyngdoh uba dei na Khyndewsoo.
U pyntip ba kine baroh laingut ki dei ruh kiba don bynta ha ka jingpynrung dkhot, jingbei tyngka bad leh ia ki kam kiban kyntiew ia ka HNLC kaba hap hapoh ka UAP Act bad ki dei ruh kiba la dep wan hikai sha Bangladesh ha u snem bala lah.
Ki Pulit kila register case ia kine hapoh ka Umiam PS Case No. 46(06)2024 u/s-120B/506 IPC R/w sec-10/13/17/18 UAP Act bad ka jingtohkit mynta ka dang iaid shakhmat ban lapdien sa ia kiwei pat ki briew kiba lah ban dei ki dkhot ne don jingiadei bad ka HNLC.
Ia kine ki lai ngut la ialam tian bishar hynne ka sngi ha kaba ka Iingkashari kala aibor ban set 10 sngi ia ki hapoh ka Police Custody.
Ha kajuh ka por, u SP ula kyntu ia ki paidbah ba kim dei ban siew ia ka pisa ba dawa da ka HNLC hynrei ban wan pyntip lada don ba phone ne ioh shithi dawa sha ki Pulit.
