Shillong, Risaw 01 : Ki Pulit ka East Jaintia Hills kila lap bad kyndang ia kawei ka karkhana rit ba shna dawai jyrhoh thok ban khaii sha Bangladesh bad kem ia lai ngut ki briew kynthup u Trai.
Kane ka jingjia kala jia ha ka sngi Saitjain, ong u Superintendent of Police ka East Jaintia Hills Jagpal Singh Dhanoa ula pyntip ba halor ki jingtip kiba bniah, ki Pulit ka Khliehriat kila ioh em ia uwei u briew ba kyrteng u Altaf Hussain bad na ka kudam jong u, la ioh ban kurup ia palat 9883 bilor ka dawai Phensedyl ba shna thok.
U pyntip ba da ka jingialam lynti u Hussain, ki Pulit kila iohkem ia u briew ba donkti hakhmat eh bad une u briew u kyrteng u Ratan Dkhar uba dei na Ummulong.
U SP u pyntip ba ha ka jingtohkit, une u briew ula phla ba ula buh ia kawei ka karkhana rit hakrum jong ka Iing ba u sah bad hangne la shna thok ia ki dawai jyrhoh bad ai kyrteng hi da ka Phendedyl ban ioh khaii tuh sha Bangladesh.
Na ka iingsah u Ratan, ki Pulit kila ioh kurup biang haduh 600 bilor ka Elcodyl cough syrup ( ba 100ml), 10 bitor ka kynja rong (ba 500 ml kawei), 11 bitor ka rong jingbam (1 kg kawei), 10 kg ka Diphenhydramine Hydrochloride ( ka jingkhlieh ha ka Phensedyl), 1 kg ka Chlorphenirame Maleato ( jingkhleh ha ka Phensedyl), 7 tylli ki kot jong ka Pharmacology bad Drug preparations, 34 bitor ka Phensedyl(100ml), 780 tylli ki bitor thylli ba 100ml jong ka dawai Phensedyl, 46 synduk ka dawai Phensedyl bala shon muhor, 1 synduk ki jingtap bitor, shiplastic ka Phensedyl labels, kawei ka bottling machine, 2 tylli ki machine ban shna dawai bad ka jingjiar nalor ka song pisa ba T. 11,790.
U Ratan ula phla ruh ba ialeh lang ia kane ka kam bad arngut ki briew ba Assam. Kine ki dei u Altaf bad u Shaheen kiba ju iarap ban pynpoi ia kine ki dawai sha Assam.
U SP u pyntip ba ia kine ki nong Assam ruh la ioh ban kem mynta da ka Pulit. Ia kine ki briew la register case ha Khliehriat Police Station.
