Tura, Nohprah 21: Ka kynhun ki Nongtuh kila kyndang jubor hynnin ka miet sngi Balang ia kawei ka ATM kiosk ka State Bank of India (SBI) ha Rongram, kaba jngai kumba 15 km na Tura bad ioh rong tuh haduh T.30 lak ka pisa.
Kat kum ka khubor Pulit, kane ka kynhun ki nongtuh kila kyndang bad plied ia ka strong box jong ka ATM da kaba pyndonkam ia ka gas cutter.
Ia kane ka kam la lap hynne ka step sngi Palei haba ki nongleit sei pisa, kila leit sha kane ka ATM ban sei pisa bad lap pynban ia ka jingmeh ding shapoh ka kiosk. Kila shem ba jingkhang jong ka ATM kala khang mar shiteng bad ka machine kala shah kyndang lut ploin bad shah thang.
“Ki nongtrei ka Bank kila don ha kane ka jaka ban tohkit ha ryngkat ka kynhun ki Pulit. Kat kum ka jingiathuh ka Bank, la suba jur ba palat T.30 lak ka pisa kala shah tuh. Ka Bank ka dang khein jingkhein mynta ban tip thikna ia ka pisa” ong u Abraham T Sangma, Superintendent of Police ka West Garo Hills.
Ka rukom tuh ka dei kaba la suhbuit bha bad kaba da plan janai ha kaba ki nongtuh kila pyndonkam da ka gas torch ban ot ia ka synduk steel ba thep ia ka pisa. Shuwa kane, kila tah iong ruh ia ki CCTV camera ba don ha ATM da kaba synreit da ka rong ban lait na ka jingshah ring dur.
Kane ka ATM , kaba don shabar ka Rongram Petrol Station jong ka Indian Oil, ka dei kaba la pynap da ki CCTV na kane ka Petrol Station bad ruh ki CCTV jong kawei ka showroom thuk thuk kaba don marjan. Ka CCTV kaba don eh ka dei jong ka showroom hynrei kane ruh kala shah pynjulor da ka jingsynreit rong.
