Shillong, Naitung 30 : Ha ka sienjam kaba iasyriem bad kaei kaba la leh da ka Sorkar Assam, ka Garo Hills Autonomous District Council (GHADC) kala sdang ia ka jingkyndang ia ki nongbuhai shnong be-ain ha ki jaka khappud kiba don markhap bad ka Goalpara, Assam.
Haba pyntreikam ia ki notice bala phah lah slem bha sha kine ki briew, ka GHADC kala pynpra syndon ia ki 6 tylli ki Iing kiba la shna beain ha ka jaka jong ka Council.
U Deputy Chief Executive Member (DyCEM) ka GHADC Nikman Ch Marak, ula pynthikna ia kane ka kam bad ong “Ngi la peitthuh bha. Hynnin ka sgi, ngi la khmih hi dalade ia ka jingleit kyndang ia ki iing beain na ka jaka jong ka Council kiba don ha ki jaka khappud ka Assam. Kine ki briew kim shym la lah ban pynthikna ia ka jaka ba ki wan, kumta ngi la kyndang beit beit ia ki”.
U Marak ula iathuh ba wat hadien ka jingphah notice la arsnem mynshuwa, kine ki briew kim shym la lah ban pynithuh ialade ba ki dei ki nongshongshnong ka Jylla. “Kila bteng ban shong ban sah wat hadien bala kut ka jingaipor bad ki khlem lah satia ban pyni ia kino kino ki kot ki sla kiba biang. Kumta, ngim don lad da kumwei pat hynrei ban pyniaid shakhmat ia ka jingkyndang ia ki” ula ong.
Namar ka jingsngewkhia ia ka jingnang bun ki phetwir kiba shah kyndang na Assam kiba lah ban wan rung sha Meghalaya, ka GHADC kala pynkhlain bha ia ka jingpeitngor. “Ngi la peitngor khlem sangeh ia ka jinglong jingman. Baroh ki nongtrei jong ngi kila buddien bha ia kane ka kam” ula pynthikna.
U Marak u pyntip ba ka Council kala aibor ruh ia ki khlieh nongsynshar kynthup ki Nokma bad Rangbah Shnong ba kin long kum ki nongai jingtip.
Ula pyntip ba ka GHADC kala peit pyrman bha ia kaei kaba jia ha Assam bad ka long kaba la pynkhreh ialade lada mih kino kino ki jingjia.
 kala sdang ia ka jingkyndang ia ki nongbuhai shnong be-ain ha ki jaka khappud kiba don markhap bad ka Goalpara, Assam.){kind=link}