Shillong, Naitung 30 : Ka Natonal Federation for New States (NFNS), ka kynhun synrop jong ki seng bapher bapher ba dawa pynkha Jylla thymmai ha kylleng ka Ri India, kala rai ban pynjur ia ka jingialeh da kaba pynlong ia ka jingiashong kyllain mungor ha Jantar Mantar, New Delhi ha u bnai Nohprah, ha ka por ba long Dorbar Tlang ka Parliament.
Ia kane ka rai la shim ha ka jingialang ha Shillong, kaba dei ruh ka National Convention ba nyngkong ka NFNS bala pynlong ha ka thain Shatei Lam Mihngi ka Ri.
“Kane ka jingialang kan dei kaba sah jingkynmaw namar ka dei ka sien ba nyngkong ba baroh ki dkhot ka NFNS kila iakynduh lang ha Shillong” ong u Stalin Ingti, Secretary ka NFNS haba bynrap ba ka Federation kala dep pynlong teng ia ki jingialang ha Tura, Karbi Anglong, Tripura, Delhi bad Vidarbha.
Haba iakren bad ki nongthoh khubor ula ong “Ngi la rai ban pyniaid shakhmat ia ki jingiakhih jong ngi ha Delhi hadien ka 20 tarik Nailur bad ngin sa pynlong ia ka jingiakhih kaba heh ha u Nohprah. Kane ka jingialeh kam dei shuh kaba thymmai-ka dei kaba la suhthied na ka jingdawa Jylla la ka jong ha kylleng ki thain kynthup ha Karbi Anglong, Garo Hills bad Tripura”.
U Ingti u la pynkynmaw ba ka jingdawa ka Karbi Anglong ban ai Jylla la ka jong ka dei kaba la sdang naduh ka por jong ka All Party Hill Leaders Conference (APHLC) hynrei ka khlem pat urlong satia, um kum jong ka Khasi bad Jaintia Hills. U la bynrap ba watla ka Sorkar Pdeng kala sdang ia ka jingiakren ba lai liang mala hadien ka jingpynkha ia ka Telangana ha u snem 2013, ka jingiakren pat kala shu sahteng sah haduh mynta.
“Ngi dawa ban sdang biang ia ka jingiakren ba lai liang mamla hapdeng ka Sorkar Pdeng, ka Sorkar Jylla bad ki seng kiba don hapoh ka NFNS” ula ong.
Haba bynrap ia kane, u Vice President ka NFNS bad DyCEM ka GHADC, Nikman Ch Marak, ula pynbna ba ka kynhun kan sa pan ia ka por ban iakynduh ia u Myntri kam Pohiing ka Ri hadien ka 23 tarik u Nailar.
“Ka jingthmu jong ngi ka long ban pyniaid shakhmat ia ka jingdawa ban ai jylla la ka jong ia baroh ki dkhot jong ka NFNS” ula ong.
Ka NFNS ka wanrah lang hajuh ia ki jingialeh ban ioh Jylla la ka jong na ka thain Shatei Lam Mihngi, kynthup ka Indigenous People’s Front ka Tripura (IPTF), Garo Hills State Movement Committee, HSPSP, bad JACAS. Ka kynthup ruh ia ki seng kiba dei na kiwei pat ki Jylla ka Ri India ba kynthup ia ka Jharkhand, Vidarbha, Bundelkhand bad Ladakh.
, ka kynhun synrop jong ki seng bapher bapher ba dawa pynkha Jylla thymmai ha kylleng ka Ri India, kala rai ban pynjur ia ka jingialeh da kaba pynlong ia ka jingiashong kyllain mungor ha Jantar Mantar, New Delhi ha u bnai Nohprah, ha ka por ba long Dorbar Tlang ka Parliament.){kind=link}