Dhubri, Naitung 22 :U nongkhaii masi beain ba shyrkhei, u Adam Ali u la kyllon iap na ka jingiather kuli ki pulit bad ki dkhot ka kynhun runar ka jong u hajan khappud ka Assam-Bengal hapoh Dhubri district ha kane ka step sngi Balang ba la lah.
Kham hashwa, uAdam u la shah kem noh ha u bnai Risaw 2020 ha ryngkat ka suloi AK-47, hynrei hadien u la lait jamin bad sdang ia kane ka kam beain na Coochbehar district ka West Bengal.
Na ka liang u heh pulit u la ong ba hadien ba ki la ioh ia ka jingtip ka ba bniah ia ka jaka riehtngen jong u Adam ha Halakur ka ba marpyrshah ka jaka rung hapdeng ka Assam-Bengal, kumta ruh ki bor pulit ki la pynlong ka jingkhynra ha kane ka jaka.Hadien ba u Adam u la phet krad na ka liang ki pulit ka Dhubri ki la bteng ban beh thong bad ha ka ba khatduh ki la ioh kem ia u na katei ka jaka khappud.
Hynrei, katba ki pulit ki dang pynlong ia ka jingtohkit, une u runar u la phla halor ka jingdon kiwei pat ki paralok nalor ki tiar siat ki ba ki thmu ban pynpoi shapoh Kokrajhar district.Hadien ki pulit ki la leit sha katei ka jaka ha khappud ka Kokrajhar (Basbari), kane ka kynhun pulit ka la ngat ha ka jingshah ther kuli ha ki briew jong u Adam bad ha kane ka jingiather markylliang, u Adam u la kyllon iap, ong ka khubor pulit.
Halor kane ka jingjia na ka liang u Superintendent of Police ka Dhubri, u Abhijit Gurav Dilip u la pyntip ba ha katei ka jingleit khynra ki bor pulit ruh ki la siat kumba lai kuli na ka bynta ban iada ia lade.
Hadien ia baroh ki ba la mynsaw ha kane ka jingiather kuli la pynkynriah noh mardor shapoh Dhubri Civil Hospital ha ka ba u doktor u la pynbna iap ia u Adam Ali.Ia ka met iap jong u la ithuh da u para jong u, u Kadam Ali lem bad ki ba haiing hasem, ong u SP. Ha katei ka jaka ba jia ka jingiather kuli ki pulit ki la ioh ruh ban kurup ia kawei ka suloi AK.
