Nongpoh, Jymmang 30 : Ka jingther u lapbah uba la iaid mynta la arsngi tam, kala wanrah ia ka jingshlei um kaba shyrkhei ha ki jaka them jong ka Ri-Bhoi District khamtam ha ki thain Jorabat-Khanapara haduh ba ka surok National Highway-06 kala kylla long kum ka wahbah.
Ki kali rit kila per ha sla um ha kane ka thain jong ka Ri-Bhoi bad ka leit ka wan jong ki kali kala sahkut beit sbak namar ka jingbym long shuh ban iaid.
Ka shnong Umpher kaba don ha Byrnihat, kaba dang shu mad ia ka jingshlei um dang ha kine ki khyndiat taiew, mynta ka kynti kala sakhi ia ka jingnang shyrkhei ka jingshlei um haduh ba bun ki jaka kila ngam shapoh ka umsaw kaba tap ia ka shnong.
Dang ha kine ki kyndiat sngi, u MLA ka Jirang Bah Sosthenes Sohtun ha ryngkat u Deputy Commissioner bad ki Engineer ka PWD bad NHAI, kila hiar jurip ia ka shnong Umpher. Kane ka jingjurip ka long eh ban peitthuh ia kiei ki jingdonkam ba hap ban leh, ban tem noh ia ka jingshlei um.
Na ka liang u MLA ula bthah ia ka NHAI ba kan shna pynbha noh ia ki nala hapoh ka thain namar ka jingshem ba dei ki nala kiba long ka daw bah halor ka jingshlei um ka shnong lada neh ka jinghap slap.
Ka jingshlei um ha Byrnihat-Jorabat-Khanapara ka dei na ka jingioh lang ka umslap kaba wan tuid na kylleng ki jaka khamtam na ki jaka lum ka Meghalaya. Ka daw hi ka dei namar ka jingbym biang ki nala ban tuid ka um bad ka jingsahkut jong ki jaboh jabain ha ki nala.
Ka jingdheng kali kaba shyrkhei kala don mynta ha kane ka thain jong ka Ri-Bhoi namar ka jingshlei um jong ka surok.
