Shillong, Naiwieng 20: Ki Pulit ka East Jaintia Hills kila ioh ban kurup haduh 4135 bitor ki dawai jyrhoh Phensedyl ba 100 ml shibitor, na kawei ka trok kit umphniang kaba kylla bad hap shapoh ka riat Umtyra NH-06 myn ha ka step 17 tarik u Naiwieng.
Kat kum ka jingiathuh ki Pulit, kane ka trok ba don u nombor NL01-AH-2246 ba niah da u Shakeep Sheik ba na Maharashtra, kala kylla ha ka por 6:30 baje mynstep bad la iathuh ba une u nongniah ula sahkut hapih ka trok hapdeng ka jingmynsaw kaba jur.
La iathuh ba hadien ki Pulit kila leit ban sei ia u bad rah sha Civil Hospital Khliehriat ban ioh ia ka jingsumar.
Ha ka jingtohkit, une u nongniah ula pyntip ba kane ka trok ka dei kaba kit ia ka diesel bad la shem ruh ia ki kot ki sla napoh ka trok hynrei ynda la khmih bniah ia ki kot ki sla, la shem ba u trai bad ka jaka sah ka iapher na ka e-challan App.
Haba tohkit bniah na ka Bharat Petroleum Transport Office, la shem ba kane ka kali kam dei satia kaba kit umphniang na ka refinery jong ka, kaba la pynmih ia ka jingsuba sniew ba ka don kaei re kaei ha lyndet.
Ki Pulit hynne ka 20 tarik Naiwieng, kila leit ban talasi ia kane ka trok bad kumjuh ia ka tanky bad shem pynban ia kawei ka jaka bala shna kyrpang hapoh ka tanker. Ki Pilit ha ryngkat ki nongsakhi shimet, kila ot ia kane ka tanker bad la shem pynban ia ki dawai phensedyl.
Halor kane ka jingshem, ki Pulit kila kem noh ia u Shakeep Sheik bad la kurup noh ia kiwei ki dawai jyrhoh ba 4235 bitor lem bad ia kane ka trok.
Ki pulit kila register case halor kane ka jingjia hapoh ka Khliehriat PS kat kum ka case No. 90(11)2023 u/s 279/337/338/427 IPC R/w Sec 22(c)/29 NDPS Act.
