Ap ka NDA ban thaw biang ia ka Sorkar ba lai
New Delhi, Jylliew 05 : Namar ka jingduna jong ka BJP ban kynjoh ia ka jingjop ba bun paid (majority)ha Lok Sabha bad ka jingdonkam ia ki paralok NDA ban lah thaw Sorkar ha Delhi, u Myntri Rangbah ka Bihar bad President ka JD(U) Nitesh Kumar bad u President ka TDP N Chandrababu Naidu, kila kylla long mynta kum ki nongthung syiem ban pynthikna ia ka jingthung Sorkar.
Ka Election Commission of India (ECI) ha ka sngi Ba-ar, kala pynbna ia ka result jong baroh ki 543 tylli ki Lok Sabha seat kaba leit sha ka jingiathep vote naduh ka 19 tarik Iaiong haduh ka 1 tarik Jylliew, kaba pyni ba ka kynhun synrop National Democratic Alliance (NDA) ba ialam da ka BJP kam shym la kynjoh ia ka jingkhmih lynti ban jop bun paid eh ha ka lyer ba khlain jong ka kynhun Liang Pyrshah INDIA Bloc.
Ka BJP kala jop haduh 240 seat, kaba duna ia ka jingdonkam paid ba 272 ban thaw Sorkar katba ka Congress kala jop 99.
Ka Telugu Desam Party (TDP) u Chandrababu Naidu, kala jop 16 tylli ki Lok Sabha seat katba ka JD(U) u Nitest Kumar kala jop 12 seat ha Andhra Pradesh bad Bihar.
Da 28 seat hapdeng jong ki, u N Chandrababu Naidu bad Nitest Kumar kila bat ia u shabi ha kti ban pynthikna ba ka NDA kan ioh thaw Sorkar biang. Baroh kine ki artylli ki party kila khlei ka juban lak ba kyrshan ia ka NDA bad kin sa iadonlang ha ka jingialang jong ka NDA ka ban long mynta ka sngi Balang.
Shisngi hadien ba pynbna ia ka Result, kine ki arngut ki Nongialam ka TDP bad JD(U) kila don mynta ha ka liengsuin ban hiar sha Delhi na ka bynta ka jingialang jong ka NDA.
Kat kum ka khubor la iathuh ba ki Nongialam ka INDIA Bloc kila phah ktien sha kine ki arngut ki Nongialam ka TDP bad JD(U) ban khroh ia ki ba kin wan iasoh sha ka INDIA Bloc ha kaban thaw iaka Sorkar kaba thymmai. Ka INDIA Bloc ka donkam ia ka jingkyrshan jong ka TDP bad JD(U) lem bad ki katto katne ki MP ban ioh kam ia ka jingdon bun paid.
Baroh ki Nongialam seng sain pyrthei ka NDA bad INDIA Bloc kila her sha Delhi ban iakren halor ki lynti jam ba shakhmat. Kaba itynnad ka long, ba u Nitsh Kumar uba iatip baroh ia ka jingkylla khlieh khlieh tdong tdong ha ka sain pyrthei, un don ha kajuh ka liengsuin bad u paralok ka INDIA Bloc bad Nongialam ka RJD Tejashwi Yadav.
U Nitesh Kumar bad u Yadav ki dei kiba la iatreilang teng, kin don ha kajuh ka liengsuin ban leit sha Delhi ha kaban iashim bynta hala ki jong ki jong ki Jingialang.
ha Lok Sabha bad ka jingdonkam ia ki paralok NDA ban lah thaw Sorkar ha Delhi, u Myntri Rangbah ka Bihar bad President ka JD(U) Nitesh Kumar bad u President ka TDP N Chandrababu Naidu, kila kylla long mynta kum ki nongthung syiem ban pynthikna ia ka jingthung Sorkar.){kind=link}