Shillong, Risaw 02 : Ka jingjied khlem da bishar bha ia ka jaka ban buh ia ka Iew die dohkha ka juk mynta ha Saiden, Ri-Bhoi District ka la lam sha ka jingbym lah pyndonkam ia kane ka Iew wat hadien 3 snem bala dep tei ia ka, kaba long ruh kum ka jingpynlut ba khlem phoida haduh T. 1.44 klur.
Ka Ophis u Comptroller and Auditor General of India (CAG) ha ka kaikhlaw ula ong ba ki bor Sorkar ki khlem da wad bniah bha hashuwa ban shim rai ia kane ka jaka ban tei ia ka iew dohkha kat kum kane ka juk ba mynta.
“Kumta, ka jingtei ia kane ka Iew ha shnong Saiden, Nongpoh, 6.2 km na Iew Nongpoh, khlem kano kano ka jingwad bniah, kala lam sha ka jingbym poi dohkha ha kane ka iew bad ka iew kala shu sah khlem pyndonkam wat hadien palat lai snem bala dep tei ia ka” kala ong haba bynrap “Kane kala lam sha ka jingpynlut ba khlem phoida ba T. 1.44 klur nalor ka jingbym urlong ruh kat kum ka thong ha kaban ai ia ka iew die dohkha ia ki nongri dohkha ba kin pyniaid iew ia ka mar”.
Ka National Fisheries Development Board (NFDB), Department of Animal Husbandry, Dairying & Fisheries, Ministry of Agriculture and Farmers Welfare, ka Sorkar India ha u Nohprah, 2015, kala mynjur ia ka song pisa ba T. 1.65 klur n aka NFDB 215-2016 ban tei ia kane ka Iew dohkha ha Saiden ha kaba ia ka song pisa ba mang ban iasam ia ka jingpynlut ba long 55:45 hapdeng ka NFDB bad ka Sorkar Meghalaya.
Ka jingthmu jong kane ka project ka long ban kyntiew ia ka kamai ka kajih jong ki nongri dohkha ha ka Jylla da kaba ai ha ki ia ka jaka buh dohkha bad ka iew ba khuid ba suba ban die ia ki dohkha ba ki ri.
Ia kane ka iew dohkha la plie ha ka 17 tarik Nailar 2018 hynrei la aiti nohia ka sha ka Executive Committee ka Dorbar Shnong Saiden ha ka 12 tarik Naitung 2019, kata shisnem hadien ba plie ia ka Iew.
Ka daw ba slem ka jingaiti ia ka iew sha ka Dorbar Shnong ka dei ka bym lah ban tip namar ka jingbym ioh ia ka MoA.
Hynrei, ka Tnad ha ka 21 tarik Nailur, 2022 kala pyntip ba ka jingslem ban aiti ia kane ka Iew sha ka Dorbar Shnong ka dei namar ka jingslem ban pyndait ia u transformer bad ka pump um.
