Shillong Risaw 02: Ka Khasi Authors’ Society (KAS) kala shim ia ka rai ban leit pan jingpynshai na u Myntri Kam Pohiing jong ka Sorkar Pdeng, halor ka dorkhas kaba la aiti bad dawa ban pynrung noh iaka Ktien Khasi haka Khyrnit kaba Phra jong ka riti synshar ka ri.
Katei ka jingshim rai (Resolution) ka KAS kadei kaba la mih hadien ba kala dep pynlong iaka National Seminar ne Ka Lympung Ïamir Jingtip bad ka jingiakhih kaba jai jai ha Jantar Mantar, New Delhi.
U President ka KAS u Dr DRL Nonglait ula pyntip ba ka KAS kala rai ba kan kyntu ia ka sorkar India lyngba ka Ministry of Home Affairs (MHA) ban sdang shim noh ia ki sienjam ban rah ia katei ka Bill hapoh ka Parliament ban pynrung noh ia ka ktien Khasi haka 8th Schedule jong ka riti synshar ka ri.
Kala rai ruh ban leit aiti ia ki kot ki sla bad ia ki jingtip kiba bniah shaphang ka ktien Khasi, ka litreshor bad ka kolshor bad kumjuh ban phah ia ki jubab kiba paka kiban pynshong nongrim ia ka jingpynrung iaka ktien Khasi haka 8th Schedule.
Ka KAS kan iai ap ruh ia ka por, ha shwa ba kan shim ia ka rai ban shim ia ki sienjam kiba tyngeh halor katei ka mat jingdawa.
