Kyan ka thma hapdeng ka India bad Pakistan | Khein ka Pakistan ia ka jingsospon ia ka Indus Water Treaty kum ka “Kam thma”

Khang lut ia baroh ki kam khaii pateng bad ka India

Shillong, Iaiong 24: U Myntri Rangbah duh ka Pakistan u Muhammad Shehbaz Sharif u la pyniaid ia ka jingialang ba ha khlieh duh jong ka National Security Committee (NSC) ha ka sngi Balang, hapdeng ka jingkyan ka thma bad ka Ri India hadien ka jinghiar thma ki lehnoh ha Pahalgam, Jammu and Kashmir ha ka 22tarik Risaw.

Ka NSC ka la pynmih ïa ka jingkynthoh kaba tyngeh bha kaba pynrem jur ïa ki sienjam “ba shiliang bad bym shong hok” jong ka India, kaba la shim hadien ka jingshah thombor bad pynbna ïa kiba bun ki sienjam ban ialeh pyrshah.

Ka Committee ka la pynpaw ïa ka jingsngewkhia halor ka jingduh noh ïa ki jingim jong ki riew paidbah hynrei ka la kynthoh ïa ki kam jong ka sorkar India, da kaba niew ïa ki “kum ki kam ba saiñ hima sima, ki bym don jingkitkhlieh bad ki bym shonghok shong aiñ.” Ka Pakistan ka la kyntait jur ïa kaei kaba ka la batai kum ka “jingïalehkai kynnoh” jong ka India bad ka la maham ban pyndonkam bakla ïa ki jingjia ba sngewsih na ka bynta ka jingmyntoi ha ka saiñ hima sima.

Kashmir bad ki jingkynnoh kam lehnoh
Haba pynskhem biang ïa ka nongrim jong ka Pakistan halor ka Kashmir, ka NSC ka la pynpaw ba kane ka thaiñ ka dang don hapdeng ka jingïakynad kaba khlem pat lah ban pynbeit kaba la ithuh da ki rai ba bun jong ka UN. Ka la kynnoh ia ka India ba ka pynshitom bein ha ka rukom synshar, mut pynkylla rit paid ia ki nong Kashmir, bad ka jingpynshitom bein ia ki hok jong ki nong Kashmir lyngba ki kam kum ka jingpynlong ain jubor ia ka Waqf Bill.

Ka Pakistan ka la ban biang ïa ka jingpynrem ïa ki kam lehnoh “ha baroh ki dur jong ka,” haba kyntait ïa ka jingpyrshang jong ka India ban pynïadei ïa ka jingjia ha Pahalgam bad ka Pakistan kum ka kam ka bym don nongrim bad ka bym don jingmut. “Ha ka jingbym don kano kano ka jingtohkit kaba lah ban ngeit ne ki sakhi kiba lah ban pynshisha, kum kine ki jingkynnoh ki pynrem ia ka jingmutdur,” la ong ka kyrwoh.

Haba kren ia ki kam jong ka India ha Pakistan, ka NSC ka la kdew ïa ka jingphla jong u Commander Kulbhushan Jadhav kum “ka jingpynshisha bym lah ban ïaleh pyrshah ïa ki kam lehnoh ba la kyrshan da ka India.”

Jingmaham halor ki jjingwan khynra shapoh u pud u sam ka Pakistan
Ka Committee ka la pynrem ia kaei kaba ka la khot ki jingbyrngem ba la buhrieh na ka ri India bad ka la pynkynmaw ia ka pyrthei shaphang ki “jingpyniap briew shabar ri ba la kyrshan da ka sorkar” jong ka Ri India — ki kam kiba ka la ong ba ki pynkhein ia ka ain jong ka pyrthei. Ka Pakistan ka la smai ba kan pynphai kylla ia kino kino ki kam kiba buh jingma ia ka Ri.

Ki rai halor ki lad jingïada kiba kongsan
Ka NSC ka la pynbna ïa ki lad ki lynti kiba tyngeh kum ka jingkynthoh ïa ka rai jong ka India ban pynsangeh noh ïa ka jingïateh kular Indus Water Treaty bad ki jingkren beiñ kiba dang shen:

Ka jingkyntait ia ka jingpynsangeh shipor ia ka Indus Water Treaty : Da kaba niew ia ka jingïateh kular kum ka jingïateh ba hap burom, ka Pakistan ka la maham ba kano kano ka jingpynthut ïa ka jingtuid ka um yn kheiñ kum ka “Ka Kam Thma.”

Ka jingpynsangeh ia ki jingiateh kular ba arliang mamla: Baroh ki jingiateh bad ka India, kynthup ia ka Simla Agreement, la buh ha ka jingpynsangeh shipor haduh ba ka India kan rai pynkylla a ia ki polisi halor ka Kashmir bad ki kam lehnoh.

Ka jingkhang ia ka khappud Wagah: Naduh mynta, la pynsangeh noh ia baroh ki jingleit jingwan shabar pud, ha kaba la shah tang ia ki nongwan rung kiba biang ki kot ki slab a kin wan phai haduh ka 30 tarik u Iaiong.

Ka jingpynsangeh ia ka SAARC Visa: Baroh ki Visa SVES ba la ai sha ki nong India, la weng noh, lait noh tang ki pilgrim kiba dei ki Sikh, kiba la shah ban sah.

Ki jing beh ia ki Heh Sorkar : Ia ki briew ka India Defence, Navy bad Air Adviser ka India kiba don ha Islamabad la niew ia ki kum ki persona non grata bad ki dei ban mih noh hapoh ka 30 tarik u Iaiong.Yn pynduna ia ka Indian High Commission sha ka 30 ngut ki nongtrei.

Ka jingkhang iaka jingwan iaid ki liengsuin ka India : Ka jaka suin jong ka Pakistan la khang ban wan iaid ki liengsuin kiba dei trai bad pyniaid da ka India.

Ka jingpynsangeh ia ka khaii pateng: Baroh ki khaii pateng bad ka India, kynthup lyngba ki ri kiba lai, la pynsangeh.

Ka jingpynkhreh ia ki shipai : Ka NSC ka la pynpaw biang ba ki shipai Pakistan kila long kiba la “pynkhreh pura ban ïada ïa ka jingsynshar bad ia u pud u sam ka Ri,” da kaba kdew ïa kaei kaba kala leh ha ka jingwan hiar thma jong ka India ha u snem 2019 kum ka nuksa.