Guwahati, Nailur 16 : Ka NIT Silchar kala don biang hapdeng ka jingkyan ka jingkulmar namar ka jinglap ia uwei u samla pule uba iap hapoh ka kamra hostel jongka campus ha ka sngi Thohdieng, ha Cachar District ka Assam.
Kane ka jingkyan kala neh baroh shimiet ha ka miet sngi thohdieng bad ki samla pule kila ia mih ban iakhih pyrshah ia ki bor pyniaid kane ka jaka pule haduh ba ki Pulit kila hap ban pyndonkam da ki lathi ban tehlakam ia ki samla pule.
Kat kum ka khubor, ia ka metiap jong une u samla la lap halor u tyllai phasi hapoh ka hostel. Une uba iap ua dei u samla pule 3rd year jong ka tnad Electrical.
Ka khubor ba iathuh ba u don shibun ki sobjek ba uhap iakhun biang sa shisien bad dei haba um shym la lah ban pass ia kine ki sobjek, une u samla ula im ha ka jingkhuslai la katto katne bnai, kaba long ka daw bah ruh ba u shim ia kane ka sienjam ban dkhat jubor iala ka jingim.
“Une u Samla ula iakynduh ia u Dean ka NIT Academic Bonoy Krishna Roy bad kyrpad ba un ialeh biang ha ka eksam ban wan hynrei ula kyntait ia kane ka jingkyrpad. Namar bala jur palat ka jingkhuslap, une u samla ula dkhat jubor iala ka jingim” ong ki samla kane ka jaka pule.
Ki samla pule ka NIT Silchar kila pynlong ia ka jingiakhih kaba jur hapoh ka campus pyrshah ia ki bor pyniaid jong kane ka jaka pule halor ka jingwanrah ia ki guidelines ba thymmai ia ki samla pule. Hynrei kane ka jingiakhih ka long eh kaba thmu pyrshah ia u BK Roy ha kaba kila leit ruh ban hiar thma ia ka Iingsah jong une u Dean bad pynjulor ia ki katto katne ki kali.
Ka khubor ka iathuh ba ki samla pule kila pyrshang ruh ban wiang ding ia ka iingsah u BK Roy da kaba pyndonkam ia ka tyngdong lyer shet jingshet.
Ki Pulit kila hap ban pyndonkam ia ka bor ban beh ia ki samla pule hadien ba uwei u khynnah ula kawang da u bilor um ia u Superintendent of Police (SP) Numal Mahatta, uba dei na ka dur khmat. Ha kane ka jingbom lathi, bun ngut ki samla pule kila mynsaw bad la kit ia ki sha Silchar Medical College bad Hospital ban ai jingsumar.
Haba iakren bad ki nongthoh khubor, u Director ka NIT Silchar Dilip Kumar Baidya ula ong “Kane ka jingkynnoh dkhat jubor iala ka jingim kala jia ha ka por janmiet, ngi sngewsih jur halor kane ka jingjia”.
Ula kdew ba ki don katto katne ki jingeh ba iadei bad une u samla pule naduh kaba sdang jong ka 1st year. “Ki don ki sobjek ba u pheil bad namar kine ki sobjek, u khlem lah ban jam klas ha ryngkat kiwei kiba iapule lang bad u, kaba lah ban pynkha ia ka jingkhuslai bad pynlong ia u ban shim ia kane ka sienjam” ula ong.
Ula ong ba ki paralok jong une u samla pule, kila dei ban pyntip ia kane ka jingkhuslai une u samla sha ki Nonghikai, kiba ju don beit ryngkat ryngkat.
Hynrei, ki samla pule kila kam ba u Director u khlem treh ban iakynduh ia ki wat hapdeng ka jingap ia u baroh shimiet.
“Hynnin ngi la ap baroh shimiet ia u Directot hynrei u khlem treh ban iakynduh ia u bad kyntait ruh ia baroh ki jingkyrpad jong ngi. Manla ka sngi, kane ka jaka pule ka wanrah ia ki guidelines ba thymmai ia ki samla. Ki samla pule kim sngewtynnad satia bad ka rukom leh jong ki bor pyniaid ka NIR Silchar” ong ki samla pule.
