Shillong, Naiwieng 18 : U Myntri Rangbah ka Jylla Conrad K Sangma ula kren shai ba ka National People’s Party (NPP) ka lah ban pynkylla biang ia ka rai ban weng noh ia ka jingkyrshan ia ka sorkar BJP ha Manipur lada ka don ka jingpynkylla ia u Nongialam ha ka Sorkar.
Ka NPP kala weng noh ia ka jingkyrshan ia ka Sorkar u Biren Singh haba ai daw ia ka jingnang sniew ka jinglong jingman ka suk ka sain hapoh ka Jylla.
Wat hapdeng ka jingweng noh ia ka jingkyrshan, u Myntri Rangbah ka Jylla ula pynthikna pat ba ka NPP ka dang ieng skhem ban kyrshan ia ka National Democratic Alliance (NDA) bad ia ka thong jongka ban wanrah pat ia ka jingshongsuk ha Manipur.
“Kum ka party kaba wan ba-ar ha ka jingdon paid ha Manipur, ngi long kiba kloi ban iatreilang ha ka jingpyrshang ban wanrah pat ia ka jingsuk. Hynrei, ngim kyrshan satia ia ka jinglong nongialam u Biren Singh. Lada don ka jingpynkylla nongialam ka ban wanrah ia u soh uba bha, ngi lah ban pynkylla biang ia ka rai jong ngi” ula batai.
Haba kren halor ka nongrim jong ka party, u Conrad ula ong “Ngi don ka jingsngew ba kam don shuh ka jingshaniah ha ka jinglong nongialam u Myntri Rangbah Biren Singh. Watla ki kam umsnam kam dei satia ka lynti, kala paw pat ba ki paidbah kila sngewkhia jur bha”.
“Ngi la weng ia ka jingkyrshan ia ka Sorkar ba ialam u Biren Singh ym ka NDA” ula pynshai haba pynpaw ia ka jingsngew khia kaba jur ia ka jingnang jur ki kam umsnam ha Manipur bad pynrem jur ruh ia ka jingbym shim ka Sorkar Jylla ia ki lad ki lynti ban wanrah pat ia ka jingshaniah ha u paidbah.
U Conrad ula ong “Ngi don ka jingkyrmen ba ka jinglong jingman kan kham jai jai noh ha Manipur bad ngi kyrshan ia ka Sorkar da ka jingkhmih lynti ban wannoh ka jingjai jai. Hynrei, ha kane ka taiew bala lah, ka jinglong jingman kala nang sniew arshah” ula ong.
U Myntri Rangbah ula iathuh ba ula iakren bad ki nongialam ka BJP na Delhi bad ka NPP kala ban jur ia ka jingdonkam ban leh eiei ha kaban wanrah pat ia ka jingshaniah ha u paidbah. “Ka dei namar ka jingbym don shuh ka jingshaniah ba barh ki jingpyrshang ban wanrah ia ka jingsuk kala pulom” ula ong haba bynrap “Ym pat don satia kum kata ka jingpyrshang haduh mynta”.
U Conrad ula kyntu ia ka Sorkar Pdeng ba kan shimkhia bha ia ka jinglong jingman ha Manipur bad ban leh ia kano kano ka kam da kaba phikir khnang khnang ban lah wanrah pat ia ka jinglong ba jai jai ha Jylla.
