Nongpoh, Lber 12 : U mrad Bangsoh ba ju iatip kum u Slowloris ha ka ktien nongwei, ha ka miet sngi Ba-ar, ula leit ban kiew beit beit ha kawei ka trok kaba ieng ha rud surok NH-6 ha Ri-Bhoi lehse ha ka jingpyrkhat ba ka dei ka jaka rieh kaba shngain ia u.
Une u mrad u bym lah ban tip u wan mih nangno, ula kiew dalade ha kane ka trok ha ka por ba u nongniah bad nongbud jong ka trok ki dang mih leit shabar ha kawei ka jaka kaba don haneng ka shnong Umsawnongkharai.
Ka jingdon une u mrad kala pynkyndit thret ia ki briew jong kane ka trok, ki bym tip shuh kumno ban leh bad mar mar kila pyntip noh sha ki nongshongshong ka shnong Umsawnongkharai ba kin shimti bad ban leh eiei ha kaban ai ka jingiada ia une u mrad.
U Secretary ka Shnong Umsawnongkharai Bah Tony Shylla u iathuh ba ki nongniah trok kila pyntip ia kane ka jingwan poi une u mrad bad mar mar ki samla shnong kila leit ban jurip bad shimti noh ia u ban ai jingiada.
Ki nongialam shnong kila pyntip noh mar mar ia kane ka kam sha ka Tnad Wildlife na Ri-Bhoi, kaba la wan hynne ka sngi Balang ban shimti noh ia une u mrad ban peit thuh ia ka koit ka khiah hashuwa ban pyllait biang ia u sha ka khlaw kaba pajih na ki shnong briew ban lait na ki riew shim kabu.
Ki briew ka Wildlife ki suba jur ba ka jingwan poi wir jong ki mrad khlaw sha ki shnong briew lehse ka dei namar ka jingjur palat ka jingthang khlaw pathar da ki briew, kaba la pynduh noh ia ki jaka riehtngen jong kiba bun jait ki mrad.
Ka Tnad Wildlife ka kyntu ia ki paidbah ba kin kiar na ka jingthang dusmon ia ki khlaw ki btap kaba lah ban pynduhjait ia ki mrad ki mreng bad ki jaka shong jaka sah jong ki.
