Nongstoiñ, Nailar 8: Ki Nongshongshnong ka thain Langpih, West Khasi Hills kaba don hapdeng ka jingiakajia pud bad ka Assam, kila pynpaw ia ka jingangnud ba ka Sorkar Assam bad Meghalaya kin sdang noh mardor ia ka jingiakren pynbeit pud jong ka Langpih Sector ban pynkut noh shisyndon ia ka jingkyntur pud.
Kane ka jingangnud jong ki paidbah kala mih hadien ka jingwan sieh mawpud jong ki briew na Assam ha kine ki khyndiat taiew bad ki bnai bala lah bad ka jingwan jurip jaka jong ki Ophisar ka Sorkar Assam.
“Ngi la kwah ba ka jingiakren pynbeit pud jong ka wat ba-ar (2nd Phase) hapdeng u Myntri Rangbah ka Meghalaya Conrad Kongkal Sangma bad u Myntri Rangbah ka Assam Himanta Biswa Sarma kan sdang noh. Ngi kwah ba ka Langpih Sector kan kynthup lang ha kane ka mat iakren” ong u Sordar ka Shnong Mawiamsyiem Bah P Nongshlong haba iakren bad u Nongaikhubor ka Shlem.
Une u Nongialam Shnong ula ong ba ka jingwan sieh mawpud jong ki briew ka Sorkar Assam khlem da pyntip ia ki bor pyniaid ka West Khasi Hills ka dei ka kam sopsop bad kaba la leh da ka jingthmu kaba sniew.
“Kane kala long ruh kum ka jingpynjyrwit jyrwat ia ka jingthmu iakren pynbeit pud jong ki ar sorkar bad ka lah ruh ban wanrah ia ka jingshongsyier ia ki paid nongshongshnong” ong u Bah Nongshlong.
Une u Rangbah ula pynkynmaw ia ka jingialang jong ki arngut Myntri Rangbah ba long ha Langpih ha u bnai Naiwieng 2021, kiba la shim rai ba baroh arliang mamla kim dei satia ban leh ia kino kino ki kam kiba lah ban wanrah ia ka jingiapher jingmut lait noh tang ha kaba pyntrei ia ki kam pynroi naka bynta ka jingmyntoi ki paidbah kata ruh da kaba iapyntip markylliang hapdeng u DC ka West Khasi Hills bad u DC ka Kamrup.
“Nga lyngngoh ba kumno u DC ka Kamrup um burom ia ka rai jong kine ki arngut ki Myntri Rangbah. Kane ka pyni shai ba ki jingiakren ki Myntri Rangbah ki dei ki jingiakren biria. Lym da dei kumta, kumno ki briew ka Sorkar Assam ki wan ban sieh pud thymmai ha ka dong ka thain” ula ong.
Ha kajuh ka por, une u Sordar ka Mawiamsyiem ula ong ba ka jingpynslem bad jingbuhteng ban sorjamin ia ki jaka kiba hap hapoh ka Langpih Sector, khlem artatien ka lah ban wanrah ia ka kynrum kynram kaba jur ha ka thain.
U pyntip ba ki don bun ki shnong kynthup naduh ka Bagjeng, Nawapara, Dronpara, Mawïamsyiem bad kiwei kiwei ki shnong, kim kwah satia ban leit pynïasoh bad ka Assam.
“Lada ka sorkar ka sngewkhia halor katei ka jingwan sieh mawpud sop sop jong ki briew ka sorkar Assam, ka dei ban bthah ïa ki Chairman jong ki Regional Committee on Border Dispute, ba kin sdang noh ïa ka wat ba ar ban jurip ïa ka Langpih sector khlem da ai daw ia ka elekshon ka ban long ha u snem ban wan” ula ong.
