Shillong, Nohprah 20: U Nongialam ka UDP bad Nongialam ka Liang Pyrshah ha Khasi Hills Autonomous District Council (KHADC) Bah Titosstar Well Chyne, ula ong, ba ki MDC ka UDP ki dawa na u President ka party ba dei ban leh da kaba tyngeh ne ban beh seng ne ban suspon ia u MDC ka Nongkrem Bah Lambor Malngiang namar ka jingkyrshan iaka Executive Committee (EC) ka KHADC ba la ialam da ka seng NPP.
“Ha ka jingshisha, ngim sngewphylla ia ka jingleit kyrshan jong u Bah Lambor namar tang hadien 24 kynta ba khyllem ka EC ba nga ialam ne da ka UDP, ngi lah ioh jingtip ba sop sopba uila leit ai jingkyrshan iaka NPP tangba ngim pat ioh da kano kano ka jingthoh ne ba yn pynbna paidbah ha ki lad pathai khubor” ong u Bah Titos haba iakren bad ki nongpathai khubor hynne ka sngi Balang.
Ula ong, haba iohi ia ka jingpynbna paidbah, kum u Nongialam ka party ula bthah ia u Secretary jongka Parliamentary Party ka UDP ban lum ia ka jingialang kaba kyrkieh hynne ka sngi bad baroh ki MDC kila don lut lait noh tang u Bah Teinwell Dkhar u bym don ha ka met kaba koit ba khiah.
“Ngi la shim ia ka rai ba ngi la thoh sha u President ka UDP ba udei ban shim iaka Disciplinary Action wut wut ia kane ka jingleh ka jong u (Lambor) namar u dei u MDC jong ka party ba la pyniasoh sha ka party bad ha kajuh ka por ula iakhun iaka elekshon MLA kaba dang shu dep na ka tiket UDP” pyntip u Bah Titos.
“Ngi shim ba kane ka jingleh ka jong u (Lambor) ka long ka jingshet kylla ia ka party, ka jingshet kylla ia ngi ki para MDC khlem da kynjoh ktien ne pyntip, watla ka jingong ka jong u ka long ba u shu leit ai tang ka jingkyrshan, hynrei haba la leit ai jingkyrshan ka mut hi ba ula kwah ban mih noh na ka party” ula bynrap.
Ula ong ba ki MDC kiba don ia ka nongrim ban neh bad ka seng naduh ba kim don shuh ha ka EC, kila ia rai lang ban ia neh beit ha ka Liang Pyrshah.
“Ngi kyntu ia u President ka UDP ba u dei ban leh da kaba tyngeh pyrshah ia u Bah Lambor Malngiang. Ka jingdawa ka jong ngi ka long, ban beh seng noh ne ban suspon ne ban pynshitom tyngeh” ong u Bah Titos.
Ha kaba iadei bad ka jingpynbna u Nongialam barim bad MDC ba shusieh Bah Bindo M Lanong ban kyrshan noh ia ka EC kaba ialam da ka NPP, u Bah Titos ula ong, u Bah Bindo ula iakhun ia ka elekshon MLA kaba la dep kum u kyrtong khlem seng hynrei ka jingiakren ka dang don bad hynnin ka sngi ruh kala don ka jingiakren bad ha kine ki khyndiat sngi kan sa mih kaei kaei haba iadei bad u Bah Bindo.
