Shillong, Nailur 04: Ka Voice of the People’s Party (VPP) hynne ka sngi Nyngkong, kala dawa ba dei ban ai por tang 6 bnai iaka Expert Committee ba kan pyndep iaki kam ba iadei bad ka jingbishar iaka bhah thungkam lane ka State Reservation Policy.
Haba kren shaki lad pathai khubor hadien ka jingiakynduh ia u Myntri Rangbah ka jylla, u General Secretary ka VPP Dr. Ricky A.J Syngkon ula ong baka Party ka ai ka jingiaroh iaka sorkar namar ka jingthaw daka Expert Committee ban bishar biang iaka Reservation Policy hynrei ka sngew baka por baka sorkar ka buh haduh shisnem ban pyndep iaka kam ka long kaba slem palat.
U Dr. Syngkon ula ong ba ka VPP ka kyrmen ba kane ka Expert Committee kan leh iaki kam kata ban bishar iaka Reservation Policy khlem da noh shilliang ia kano kano ka jaidbynriew jong ka Meghalaya.
“Ka Party ka sngew ba haduh 1 snem ka long kaba la slem palat iaka Expert Committee ban bishar bniah iaka Reservation Policy bad dei namar kane ka VPP ka dawa na u myntri rangbah ban bthah iaka Committee ban pyndep noh iaki kam hapoh 6 bnai” la ong u Dr. Syngkon.
