Shillong Lber 06: U Symbud Myntri Rangbah ka jylla Bah Prestone Tynsong hynne ka sngi Balang ula pyntip ba ka Sorkar kala thaw ia ka Committee ban shong bishar bad iakhmih biang ia ka Indian Registration Act ka ban pynthikna ba ki kot ki sla bala ai da ki lai tylli ki District ka Jylla ki dei kiba la pdiang da ki borkhmih bapher bapher kynthup ki Bank.
“Ka jingialang kala iakren ha kaba iadei bad ka jingrejistar ia ki jaka ki puta bad ki District Council kila ai ia ki jingmut kiba bun bad kumta ngi la thaw ia ka Committee kaban khlieh da u Secretary ka tnad District Council Affairs u Bah Cyril V Diengdoh” ong u Bah Prestone Tynsong.
Ula ong, ba ki dkhot ha kane ka committee kin kynthup na ki 3 tylli ki District Council jong ka jylla, ka Tnad Law, Revenue bad ka tnad ERTS ban peit bad khmih bniah bha ia ka Indian Registration Act kaba pyntreikam ha ka jylla Meghalaya ha kaba iadei bad ka jingrejistar ia ki jaka.
U Bah Prestone ula ong ba ka KHADC kala dep mynjur ia ka Land Bill bad kala kylla aiñ kumta kila iatai sani bha halor ka jingrejistar ia ki jaka , namar kumba long mynta ka sorkar jylla ka hap ban bud ia ka Indian Registration Act bad kadei kaba hap ban bud pyrkhing bha.
“Ha ka jingbud ryntih ia ka Indian Registration Act, la shem ba ki don katto katne ki jingwohdong bad ki don ki khep ba ki paidbah ki leit sha ki District Council ban ioh iaka syrnod jaka ne No Objection Certificate ban ioh shim ia ka Loan ne ram, hynrei haba ki leit ban ai ia kitei ki kot ki sla, ki don ki Bank kim ai ia ka jingithuh ia ki kot ki sla kiba ai da ka District Council.
U Bah Prestone Tynsong ula ong ba halor kitei ki jingeh kiba mih, kumta la rai ban thaw ia katei ka Committee ban lah pynthikna ba ki kot ki sla kiba ai da ki 3 tylli ki District Council jong ka jylla ki dei ia kaban pdiang da kino kino ki bor khmih kynthup ia ki Bank.
