Shillong Nailur 25: Ka Sorkar Jylla kala pynpaw ia ka jingkwah ba ka jingiakren iasuk bad ka kynhun kieng atiar Hynniewtrep National Liberation Council (HNLC) kan iaid shaid shaid noh bad ban lah pynpoi ruh sha ka thong ban iasoi ia ka soskular iasuk.
Ia kane la pynpaw da u Myntri kam Pohiing ka Jylla ma Lahkmen Rymbui uba la pyntip ba ki san ngut ki Nongialam ka HNLC kiba la wan sha ka miej iakren, ki la leit phai shuwa shipor sha Bangladesh ban iasyllok bad shong pyrkhat bad ki Nongialam ba kumno yn pyniaid shakhmat ia ka kam.
“Ka Sorkar ka kyrmen skhem ba ka jingiakren bad kane ka kynhun kiengatiar (HNLC) kan sa bteng biang ha kine ki sngi ban wan bad ban pyniaid noh shaid shaid ba kan poi sha kaba kut” ong u Myntri.
Kat kum ka jingong jong u, ki jingiakren kila dep iaid hynrei na ka liang ka jong ki (HNLC), kin hap ban bishar bad pyrkhat bad dei na kata ka daw ba kila leit phai shuwa shipor sha Bangladesh. Ula pynpaw ba ka Sorkar ka kyrmen skhem ba ka jingiakren kan sa iaid beit shakhmat khnang ban lah pynbeit ia kiei kiei baroh.
“Ia ki jnit ki jnat jong ka jingiakren, ngam kwah ban ong eiei, hynrei ka jingwan iakren, naei ki wan shaei ki leit ruh ngam lah ban ong eiei, namar ngi don ia ka thong ba ka suk ka saiñ kadei ban synshar hapoh ka jylla jong ngi” ong u Myntri.
Haba kylli la ka jingiakren bala dep kala dei ka jingiakren ïasuk ne kam pat dei satia, u Bah Rymbui u la ong, “Ngam kwah ban batai eiei ruh em ia ki jnit ki jnat jong ka jingiakren namar ngi la ieh ha ki Ksiang bad hadien ba kila dep ban aiti iaka kaiphod kaba pura sha ka sorkar, hangta ngan sa batai ia baroh ki jnit ki jnat, hynrei ia mynta hi, ka dang long kloi palat, ban ong ne kren eiei halor katei ka kam”.
U Myntri Kam Pohiing u la ong, “Kam don jingeh ba katei ka jingiakren iasuk kan poi sha ka thong namar ka HNLC, ka Sorkar Pdeng bad ka Sorkar Jylla ki don ia ka rukom pyrkhat pyrdaiñ bad ia kajuh ka thong, hynrei ka sorkar ka hap peit bin pa bin ia ki kam ba kin long katkum ka riti synshar ka ri”.
U Bah Rymbui u la pynshai ruh, ba watla ka National Investigation Agency (NIA) kala Chargesheet ia ki katto katne ki nongialam ka HNLC hynrei kan ym don jingktah eiei ruh em ia ka jingiakren iasuk hapdeng ka HNLC bad ka sorkar pdeng bad ka sorkar jylla.
