Shillong, Risaw 25 : Ka sorkar jylla kala rai ban shim noh iaka rai kaba khatduh shuwa ban kut une u snem halor ka jingthmu ban pynkynriah ia ki 342 tylli ki longiing kiba shong basah ha Them Metor.
Ia katei la pyntip da u Symbud Myntri Rangbah ka jylla Bah Sniawbhalang Dhar uba khmih ia ka tnad pynroi sor da kaba ong, “Phi tip bha ia kiei kiei baroh kiba la dep ban pynkhreh da ka sorkar. Kumta shen ngin sa shim ia ka rai kaba khatduh hashwa ban kut u Naiwieng”.
“Ngi kyrmen skhem ba lada ym dei ha u Naiwieng hynrei hashwa ban kut noh une u snem, ngin sa shim ia ka rai kaba khatduh kaba ngi dei ban shim kum ka sorkar halor katei ka mat” ula ong.
U Bah Sniawbhalang ula ong baka sorkar ka dang ap ia ka jingkyrpad jong ka Harijan Panchayat Committee (HPC).
Halor ka rai jongka sorkar ban phah da ka jingthoh sha ki bor jong ka tnad Defence ban ai jaka ban pynkynriah ia kitei ki nongshong shnong, u Symbud Myntri Rangbah ula ong, “Ngam kren eiei ha kaba iadei bad ka tnad Defence. Ki kwah iaka jaka jong ka Defence hynrei ka jaka ka jong ngi ka dei kaba la dep ban pynkhreh bad kaba la don katkum ka Blueprint. Kumta kaba dang sah ka long ban iakren khnang ba ngin lah ban shim noh ia ka rai kaba khatduh”.
Ula ban jur ba ka sorkar ka kwah ba ka jingpynkynriah ia kiba sah ha Them Metor ka dei ban long katkum ka Blueprint kaba la pynkhreh da ka sorkar jylla.
“Hooid, ngi ialeh ban iai pynbor katkum ka Blueprint ka jong ngi. Hynrei namar ba ka dang don ka jingiakren bad ki dang don ki bynta kiba dang sah, ngi dang ap ia kata. Hynrei la kumno kumno, ngi kwah ban pynkut noh ia kane ka lynnong, lada ym dei ha u Naiwieng hynrei hashwa ban kut noh une u snem uba mynta” ong u Bah Sniawbhalang.
U Symbud Myntri Rangbah ula ong, ba ka jingkwah ia ka jaka jong ka Tnad Defence ka dei ka jingai jingmut kaba la ai da ka HPC.
“Ka dei ka jingai jingmut ka jongki (HPC). Lada ngi ioh ka long kaba biang bha kumta balei ngin ai da ka jaka ka jong ngi. Ka long kaba suk da kumtei” haba bynrap “Ngi dang wad ia ki lad. Shu buh lada ngi ioh ia ka jaka naka tnad Defence, ngin ym donkam shuh ban ai da ka jaka jong ka sorkar jylla. Kaba khatduh lada ngi ioh ia ka jubab na ka tnad Defence ba kam don ia ka jaka, ngi hap ban iaid shakhmat da ka jaka ka jong ngi”.
Ula ong, ba katkum ka Blueprint ka jingpynkynriah ia kitei ki longing kan long ha ka jaka kaba 2-3 akar.
