SHLLONG, Lber 05: Ka Deputy Inspector General of Police (TAP) Kong Claudia Lyngwa hynne ka sngi Ba-ar kala pynpaw ba ka jingkhang ka dang plie ban iakren iasuk bad ka sengkieng atiar kaba la shah kheiñ be-aiñ-ka Hynniewtrep National Liberation Council (HNLC) haba pyntip ba ka jingkem ia u PSO ka HNLC ka dei halor ki kam dawa pisa.
Kala iathuh ba na ka mobile phone jong u PSO Storgy Lyngdoh, ki Pulit kila lap ba ki don bun ngut ki briew kiba la shah dawa pisa.
Haba iakren bad ki nongthoh khubor ka Kong Lyngwa kala ong ba u Storgy Lyngdoh ula shu wan rung tuh sha Meghalaya na Bangladesh bad ula shah kem ha ki pulit ka East Khasi Hills. U dei ruh uba don bynta ha ka jingwan iakren iasuk.
“Kam don eiei na ngi ba kane ka jingiakren iasuk kan ym bteng shuh, kan dang iai bteng bad ka jingkhang ka dang plie beit” ong ka Kong Claudia.
Halor ka jingsaphriang ki khubor kiba la kam ba u Bah Storgy u wan sha ka jylla ban pyndem wait, ka DIG kala ong, “Une u briew ula leit sha Bangladesh bad kane ka long kaba sngewthuh shai ba lada u kwah ban pyndem wait, ula dei ban don beit hapoh Nongbah Shillong katba ka sorkar ka dang iakren, kumta na ka jingsngew ka jong ngi ka jingleit phai biang ka jong u sha Bangladesh bad ban wanphai na Bangladesh, kaba mut kumno. Nga ieh ha ka jingsngewthuh ka jong phi”.
Kala ong, “Kam shym don atia ka jingphah shithi dawa pisa na ka liang jong u ia ki briew hynrei na ka phone ka jong u pat la lap ba don bun ki phone number bad ki jingdawa pisa na kiba bun ki briew”.
Haba pynpaw ba ka jingtohkit kam dang iaid shakhmat bad kan ym sangeh, ka kong Lyngwa kala ong “Ka jingiakren iasuk kan iaid shakhmat bad lada don kino kino kiba leh ia ki kam beaiñ, ngin hap ban leh ia kaba donkam pyrshah ia ki”.
Shuh shuh, ka DIG kala iathuh ba katkum ki jingtip kiba la ioh lum, ka jingkhlaiñ jong ka seng HNLC ha ka jingdon ki dkhot ka long satang kumba 20-30 ngut. “Hynrei ngim lah pat ban batai ki don tiar siat kiba kumno shathie hynrei hangne ki don ia ki tiar kiba rit ba ria” kala ong.
Halor ka sienjam kaba ki pulit kila shim ban ioh jingshaniah na ki paidbah, ka DIG kala ong “Ka kam ka jong ngi kadei ban shimkhia mardor haba ngi ioh ia kino kino ki jingtip bad kane hi kala ai jingshaniah ia ki paidbah. Naduh ki sngi ba la sdang ia ka seng HNLC ha ka jylla, ki pulit kila trei khlem shongthait. Ngi lah aiti lut ialade bad bun ngut ki pulit kila duh ia la ka jingim ha kane ka jingiakhun. Nga tharai phi iohi mynta ba bun bha ki nongjngohkai ki wankai bad baroh kane kala pynkylla dur ia ka Meghalaya bad kane kadei namar ka jingtrei shitom bad ka jinglen lade jong ki pulit bad kane kan ai jingshaniah ia ki paidbah”.
Ka DIG kala maham ia ki paidbah kiba noh synniang sha ka HNLC namar ha kaba kut hi, kin shah pynngat ha ki kyndon aiñ.
 Kong Claudia Lyngwa hynne ka sngi Ba-ar kala pynpaw ba ka jingkhang ka dang plie ban iakren iasuk bad ka sengkieng atiar kaba la shah kheiñ be-aiñ-ka Hynniewtrep National Liberation Council (HNLC) haba pyntip ba ka jingkem ia u PSO ka HNLC ka dei halor ki kam dawa pisa.){kind=link}