Shillong, Lber 05: U samla pule MSc jong ka skulbah NEHU u Nituparna Das u la wan ba nyngkong (1st prize) haka jingiakop Research Poster haka lympung National Science Day Celebration 2024 bala pynlong daka State Council of Science Technology & Environment (SCSTE), Meghalaya.
U Das u la pyni lyngba ka Poster iaka Research bala ai kyrteng “Self Chargeable Hydrogen Based Solid-State Cell” bad kane kala ioh jingiaroh bad jingithuh na ki nongbishar ha kane ka lympung.
Ka jingiohi jngai bad ka jingtbit jong u lyngba ka Science kala pynlong ia u ban ioh syndon daka khusnam bad ka song pisa ba T.3000.
U Das u la pynkhreh iaka Research “Self Chargeable Hydrogen Based Solid-State Cell” haka jingialam lynti da u Associate Professor Satya Prakash Pati naka tnat Physics ka skulbah NEHU.
U Das u la pyni iaka sap bad iaka jinglah ban leh Research daka jinglah jong u ban sngewthuh bha iaka subject.
Nalor kane, sa 2 ngut ki samla pule MSc kata u Pranjal Sharma bad u Nituparna Das haka jingialam lynti da u Dr. Satya Prakash Pati kila ioh 1st position haka Eastern Zone Contest jong ka Anveshan 2023 Program.
Ka project jong ki kadei “Development of Low Power Consumption Artificial Neuromorphic Devices daka ba pyndonkam Proton kum Neurotransmitter” bad kane ka project ka ba kila shim kala wanrah ka burom daka ba wan nyngkong haka interdisciplinary research category.
Lyngba kane, ki 2 ngut ki samla kin ioh ban mihkhmat iaka NEHU haka jingiakop International ka ban long haka 10 tarik mynta u bnai ha University of Mumbai.
Naka liang u Vice-Chancellor ka NEHU u la iaroh ia u Nituparna Das bad u Pranjal Sharma bad ia u supervisor Dr. Satya Prakash Pati kiba la trei shitom ban wanrah iaka nam bad burom iaka skulbah.
U VC ula iaroh bad ai khublei iaka jinglah ki samla pule ban wanrah nam bad ula kyntu iaki ban nang pynleit jingmut haki jingpule jong ki.
Ka NEHU kan bteng ban kyntiew bad ai mynsiem iaki samla pule ban sei iala ki sap haka Research namar kane ka jinglah jong ki kala wanrah burom iaki samla bad iaka skulbah.
