Kwah ka KSU ia ka Reservation Policy ba thymmai ban pynbiang tarajur ia ka jingsam bhah

Ai noh 50% ia ki Khasi Jaintia, 40 % iaki Garo

Shillong, Jylliew 13: Ka Khasi Students Union (KSU) kala ban jur ia ka jingdonkam ban wanrah noh da ka State Reservation Policy ba thymmai k aba pynthikna ia ka jingpyniahap tarajur ha ka jingsam bhah bad ka kabu ia baroh lai tylli ki jaidbynriew riewlum – Khasi-Jaintia bad Garo- jong ka Jylla.

Ha ka shithi sha ka Expert Committee on State Reservation Policy bala phah hynne ka sngi Palei, ka KSU kala ong ba ka Sorkar Jylla haba wanrah ia kano kano ka kyndon ban sam bhah ha ka jingthungkam lane ki kam ba lait na ka bynta ki Garo bad Khasi Jaintia, ka lah ban shim ia ka jingdon paid hapdeng kine ki Jaidbynriew bad hadien ba dep lum jingkhein, ka lah ban sam ia ka bhah bad ai percentage na ka bhah ia kaba hap ban bud pyrrkhing bha.

“…kat kum ka khana samari 2011 jong ka Jylla Meghalaya, ka jingdon paid jong ki Khasi-Jaintia kala kot ia ka 14.1 lak ngut katba ki Garo ki don 8.21 lak tam. Kumta, kane ka jingkhein ka pyni ia ka jingdonkam ban pynthymmai ia ka State Reservation Policy khnang ba kan don ka jingsam marbiang bad ka kaby ia baroh ki briew ka jaidbynriew Khasi-Jaintia bad Garo” kala ong.

Haba shim ia ka khana samari ba khadduh eh ka Meghalaya, ka KSU ka ong “Ngi ai jingmut ba 50% na ki kam ba lait ka dei ban leit sha ki paid Khasi-Jaintia bad 40% ia ki paid Garo katba 5% ban buh ia kiwei pat ki Scheduled Tribe bad Scheduled Caste ha ki kam ba lait hapoh ka Jylla katba 5 % kaba tam ban buh sha ka unreserved category”.

Ka KSU kala ong ruh ba haba khmih ia ka kam ba iadei bad ki kam ba lait ha ki District ha kaba ki nongiohkam kim lah satia ban shah pynkynriah kam shabar jong ki District ba ki ioh kam, “Ka KSU ka tyrwa ba ka jingsam bhah kan neh hi kumba la buh ha ka Resolution No. PER.222/1/132 ba 12 tarik Kyllalyngkot 1972 da ka jingpynkylla ba malu mala lada pdiang ia ka jingtyrwa ba 50% ia ki Khasi Jaintia bad 40% ia ki Garo kata, kan don ka jingkyllum lang ia ka bhah ba 90% ia ki Khasi-Jaintia bad Garo ha ka jaka ban pyniabynta ia ka bhah ba 50% ia ki Khasi-Jaintia bad 40% ia ki Garo nalor ka 5 % bala buh bhah ia ki ST/SC kiba dei ki nongshongshnong ka Assam kiba la kylla ST/SC ha Jylla Meghalaya”.

Ka KSU kala ai jingmut ruh ba haba jied ia ki kyrtong sha ki kam ba lait, dei ban ai nyngkong eh ia ki kyrtong trai shnong kiba sah shirta ha ki District ba don ka jingthungkam.

Kane ka mut ba ha Ri-lum Garo ka bhah kyllum lang ba 90% kan long beit tang ia ki Garo lada ym don kino kino ki nong aplai kam kiba dei na Ri-lum Khasi Jaintia bad ha Ri-lum Khasi Jaintia pat, ka bhah kyllum lang ba 90 kan long thik tang ia ki Khasi-Jaintia lada kim don ki kyrtong Garo kiba aplai ia ka kam.

Nalor kane, ka KSU kala ban jur ruh ia ka jingdonkam ban pynthikna ba ka Roster System jong ka State Reservation Policy ka dei ban treikam nangne shakhmat kata naduh ka sng ba treikam ka Reservation Policy bala pynkylla thymmai ne dep pynmih ka Sorkar ha ka Gazette ka Meghalaya.

Ka KSU kala kyntu ruh ban ai 100 %ka bhah ia ki Khasi-Jaintia na ka bynta ka jingthungkam Nonghikai ha baroh ki skul kiba hap hapoh ka Schedule area jong ka Ri-lum Khasi Jaintia bad 100% ka bhah ia ki paid Garo n aka bynta ka kam nonghikai ha ki skul kiba hap hapoh ka Schedule area jong ka Ri-lum Garo.

Ka KSU kala ai jingmut ruh ba ha kane ka Reservation Policy ba thymmai, dei ban pynduh pyndam noh ia ka backlog reserve vacancy ne ban rah shakhmat ia ki kam ba khlem lah ban thung pyndap jong ki paid Garo.