Shillong, Iaiong 14 : U Nongialam ka BJP bad Myntri Sorkar Bah A.L.Hek hynne ka sngi nyngkong, ula ban jur iaka jing donkam ba ka Reservation Policy ban buh hakhmat bad ai bhah kyrpang ia ki Longiing ba duk jong ka Imlang sahlang ha Ri-lum Khasi, Jaintia bad Garo.
“Lada phi kylli ia nga, baroh ki dei ban ioh ia ka hok. Balei mynta ba ym buh hakhmat ia ki Longiing baduk ka Ri-lum Khasi, Jaintia bad Garo ha ka Job Reservation Policy bad buh ruh katto katne % ia kiba don spah (jong kine ki lai jaidbynriew). Hynrei, 50 % dei ban mang sha ki Khasi, Jaintia bad Garo kiba dei na ki Longiing baduk” ong u Bah Hek haba iakren bad ki nongthoh khubor.
Ula bynrap “Ai ba kane ruh kan mih balei ban pyrkhat tang ia kiba riew spah. Ailad lang ia kiba duktam na kiba duk ruh khnang ba ki ruh kin lah ieng hala ka kjat, kin don la ka kyrdan, bad kin lah khmih bha iala ka iing ka sem”.
Haba kylli, u bah Hek ula ong “Mynta ngi la ioh 40:40 (na kane). Ngin pynlong long 50% ia kiba duk na ki Khasi, Jaintia bad Garo bad sa 30 % ha kaba 15% kan long ia ki Khasi Jaintia bad 15 ia ki Garo. Kaei kaba bakla namar baroh 80% ka leit sha la ki jaidbynriew lajong. Da kaba leh ia kane, ka jingmyntoi kan wan sha ki briew ba duk jong ka Jylla kiba dei ki riewlum”.
Ula ong ba ki don bun bah ki briew ba duk na kawei ka pateng sha kawei pat, ki longiing jong ki, kim shym la ioh ia ka lad ban ioh kam sorkar.
Haba iadei bad ka jingpyntreikam ia ka roster system, u Bah Hek ula ong ba ula dep lum ia ka jingialang bad baroh ki Nongialam ka BJP ban iakren halor kane ka kam.
“Ngi la khot ia baroh ki Nongialam ka BJP na Ri-kum Khasi Jaintia bad Garo hynrei tang khyndiat ngut kiba don ha Shillong. Mynta ngi la rai ban iathuh ia u President Bah Ernest Mawrie ruh hynnin ba ngi kwah ban khot mardor ia kane ka jingialang bad ki nongialam na Ri-lum Garo bad Jaintia ruh ban iakren ia kane ka ishu kaba don mynta hapoh ka Jylla” ula ong.
Nalor kane, une u Nongialam ka BJP ula kdew ia ka jingkren jong u Symbud Myntri Rangbah ka Jylla Bah Prestone Tynsong ba ka Sorkar kala file haduh laisien ia ka affidavit sha Iingkashari ban pyntreikam ia ka roster system nangne shakhmat bad ong “Ka Sorkar kala shim ia ka sienjam halor kane ka kam”.
Ula ong ba ki khmih lynti ia u Myntri Rangbah ban khot ha kano kano ka por ia ka jingialang jong ka Kynhun Myntri ban iakren ia kane ka kam.
