Shillong, Nailar 09: Ka workshop ba arsngi halor ka Agroecology Learning Circles (ALC) bad ka Natural Resource Management kala kut noh hynne ka sngi haka sngi rakhe ‘International Day of the World’s Indigenous Peoples’ bala pynlong ha State Central Library, Shillong.
Ha kane ka workshop ba arsngi, la wan shim bynta da u Gunanka DB, IFS, Additional Project Director ka MCLLMP kum u kongsan.
Ha kane ka sngi ki nongrep na kumba 100 tylli ki shnong kila wan shim bynta ban iathir ha kane ka workshop bala pynlong daka NESFAS bad ka MBMA haka jingiatreilang bad ka SURE, SSC.
Ka workshop kadei ruh naka bynta ban iathir bad ia phylliew jingmut halor ki rukom rep katkum ki juk naduh ki por mynshwa ban pynneh iaka rukom rep ki juk mynshwa daka ba pynneh iaka khyndew, ka rukom bet symbau, Forest Management Plan, Payment for Ecosystem Services, Water Resource Management bad ki Living Root Bridges.
Ha kane ka jingiathir ki nongrep kila ia sam markylliang iaki buit haba iadei bad ka rep ka riang bad ha kane ka sngi la pyllait paidbah ruh iaka kot ‘Community Seed Bank Catalogue’ bad ka ‘Natural Pest Management’.
Ha kane ka workshop, la pynlong ruh iaka jingpyninam iaki symbai, biopesticides, biodiversity-based Midday meals initiatives bad ki buit ba pyntreikam daka NRM naka bynta ban ia sam markylliang iaka jingriew spah ki nongrep khamtam haka jinglah ban pynmih ki mar bam jong ki paid ka jylla.
Haba kren ha kane ka sngi u D.B Gunanka ula iaroh iaka NESFAS bad iaki paralok kum ka CLLMP kiba la lah ban pynurlong ia kane ka workshop halor ka ALC bad ula kdew ba ka don ka jingiashriem hapdeng ka Meghalaya bad ka Karnataka namar u Krai (Millet) udei u marbam bas mat bha ki briew ban bam hadien bala kynriah pat sha u Khaw (Rice).
U D.B Gunanka ula ong “Donkam ban pynkhlain iaka jingiatreilang bad ki shnong ki thaw ban pynthikna ba kane ka projek ka long kaba seisoh bad donkam ban pynim ia kane”.
Naka liang u bah Pius Ranee u badei ruh u Executive Director ka NESFAS ula pynpaw ba ka ALC kala dei ka rynsan haka ba ki nongrep bad ki stad ki iaphylliew jingmut halor ka Agroecology, ka jinglong kyrpang ki marbam bad kiwei kiwei de ki lad ban kyntiew iaka rukom pynmih marbam.
Iaka Agroecology Learning Circles (ALCs) naka bynta ban pynim iaki jingdon jingem ka mei mariang la bei tyngka daka World Bank bad la kyrshan daka Meghalaya Basin Management Agency (MBMA) haka jingiatreilang bad ka NESFAS ban thaw haduh 100 tylli ki ALC hapoh Meghalaya.
Ka jingiatai ba arsngi kala kut noh hynne ka sngi haka ba u Adviser ka NESFAS u Dr. Dhrupad Choudhury ula aikhublei iaka NESFAS bad iaka MBMA kiba la pynlong ia kane ka workshop ba arsngi ka ban dei ruh ka rynsan naka bynta ki nongrep bad ki stad ban iakynduh lang ban iaphylliew jingmut kumno ban kyntiew iaki buit pynmih iaki marbam ba kyrpang jong ka jylla.
Naka liang ka kong Otilia Mukhim na Jatah Lakadong kala sam iaki jingmyntoi ba ka ioh naka NESFAS bad kala ai khublei iaka MBMA kaba la ailad ban don kum kane ka rynsan ban iaphylliew jingmut lang baroh.
“Ka long kaba donkam ban pynneh iaki khlaw ki btap, ki wah bad donkam ban pynneh iaki rukom pynmih marbam kyrpang bad lyngba ka ALC ki dkhot ki lah ban sam iaki jingtip sha ki SHG khamtam sha ki samla ban pynneh iala ki rukom tynrai halor ka jingpynmih marbam” akla ong.
