Tura, Naiwieng 11: Ka Wangala Festival kaba shisien shi snem kala kut noh hynne ka sngi ha ka jingiphuh iphieng da ka jingwan ban sakhi da ki hajar ngut ki paidbah na kylleng ki jaka.
Kane ka shad kaba la tip ruh kum ka “100 Drums” kaba 3 sngi kala long kaba heh bha bad mynta ka kynti ka jingwan tuid u paidbah kala bun bha haba ianujor bad ki snem kiba la leit.
Haba kren kum u kongsan, u MLA ka Mahendraganj Constituency, u Sanjay A Sangma ula pynpaw ia ka jingsngewnguh ia ki nongkitkam jongka Wangala Committee kiba la trei shitom met bad mynsiem ha kaban pynneh pynsah iaka jingriewspah ka kolshor bad ia ka riti dustur tynrai jong ki jaidbynriew Garo da kaba pynlong ia kane ka jinglehkmen man la u snem.
Ula ong ba kane ka tamasa kadei kaba pyni iaka rukom im jong ki riewlum bad ka long kaba kongsna ban pynneh pynsah iaka jinglong ba kyrpang jong ki riewlum, ka kolshor bad ia ka riti dustur tynrai.
U Sanjay ula pynkynmaw ruh ia u nongseng jong ka Wangala Committee u (L) L.K Marak bad ula ong b aula iohi iaka jingtrei shitrhem bad ka jingnoh synniang ka jongu na ka bynta ka jingmyntoi jong ka imlang sahlang.
Ula ong ba ki briew mynta kim nang shuh ban shad iaka Shad Wangala haba ka don kano kano ka prokram ne ka jingialang bad ula ai jingmut ba ka tnad pule puthi kadei ban shim ia ka sienjam ban ai jinghikai ia ki khynnah pule ha ki skul bad ula kyntu ia baroh ba kidei ban riam tynrai haba ki iashimbynta ha ka Wangala Festival.
Katba u Rupa M Marak, MLA ka Dadenggre Constituency kum u symbud kongsan ula ong, ba mynshwa ula mut ba ka jingpynlong ia kane ka tamasa kadei tang na ka ha ka nam ba la pynlong ia ka, hynrei hadien ba la wan sakhi ia ka Wangala ha u snem ba la dep ha Chibragre, ula sngewthuh ia ka jingkongsan jong kane ka tamasa bad ia ka jingdonkam ban pynneh pynsah ia ka kolshor na ka bynta ki pateng ban dang wan.
Ula ai jingmut ia baroh ba kidei ban hikai ban nang ia ka kolshor bad iaka jinglehniam tynrai haba don kiba la khlad noh bad ia ka rukom leh ha kaba iadei bad ka jingwad ia u shynrang ha ka jingkyntiew kuri, bad kumta ter ter.
Na ka liang u Deputy Commissioner ka West Garo Hills u Jagdish Chelani ula pyrshang ban kren haka jingialang da ka ktien Garo bad kren shaphang ka jingkongsan bad ka jingkordor jong ka Wangala Festival.
Hashwa kane u Chairman jongka Wangala Committee u Ronald Rikman Sangma ula ai ka jingbatai kaba bniah shaphang ka histori bad ka jingsdang jong ka Shad Wangala bad ia ka jingdonkam ban pynneh pynsah iaka kolshor bad iaka riti dustur tynrai jong ki Garo.
Ki nongjngohkai naka kylleng ri kiba kynthup na ka ri Germany, Switzerland, France, Bangladesh bad na ki jylla kiba kynthup ia ka Tamil Nadu, Pune, Assam, bad ki nongpathai khubor na kylleng kila wan ban sakhi ia ka shad Wangala.
Ki shiphew tylli ki kynhun kiba la iashimbynta ha ka jingiakob ki kynthup ia ka Gondenggre, Chibragre, Chidaogre, Sadolbra, Buripara, Dalbenggre, Bolbokgre kiba na West Garo Hills, ka Wanokdamgre na North Garo Hills, Rongjeng na East Garo Hills bad Chepagre na South West Garo Hills Districts.
Ka kynhun na Gondenggre kala long ka lahduh ha ka jingiakob mynta u snem bad kaba la wan baar kadei ka Chidaogre bad ka Sadolbra kala wan balai.
Ha kane ka tamasa la wan ban iadonlang ki heh ki haiñ, ki bor pyniaid district bad ki paidbah na kylleng ka rilum Garo.
