Shillong, Lber 30 : Ka Ri-Tyngkai Festival 2026 kala kut noh hapdeng ka jingshongkun bad la pynlong ia ka da ka jingthmu ban kyntiew bad saindur ia ka sap ka phong jong ki samla ha ki bynta ki bapher bapher.
Kane ka dei ka seinjam kaba la sdang da ka Hid Foundation Shillong ryngkat ka jingiatreilang bad ka Seng Samla Shnong, Mawlong, Ri-Bhoi, District da ka jingthmu ban ai ka rynsan ia ki khynnah bad ki samla ba kin pyni ia ka sap ka phong ka jongki.
Ia kane ka tamasa la plie da ka Kong JS D. Maiong ka Dkhot jong ka State Commission for Protection of Child Rights ka sorkar jylla kum ka Kongsan ha ryngkat ka jingdonlang u Bah Plielad Tiewsoh u Chairman ka Ri-Bhoi Tourism Development Forum, ki Rangbah Shnong, longkmie bad ki samla ka thain.
Ha kane ka jingiakob kila don palat 20 tylli ki kynhun bad ki riewshimet kiba la wan ban iashimbynta ha ka Talent Show.
Ha ka jingiakob rwai u Wanborlang Mawphniang ula wan Nyngkong, baar la ioh da ka Teideplut Marsing bad Balai ka Ribamon Rynshon katba kiba la ioh ia ka Consolation Prize ha ka jingiakob rwai ki kynthup ia u Mayos Madur ha ka jingiakob shad pat ki kynthup ia ka Ilapynsuk kharkongor, ka Govt LP School Mawlong bad ka Katepery Matong.
Ia ka prokram ha ka por janmiet, pat la wan ban plie da ka MDC ka thain ka Kong Rona Khymdeit bad la pynlong ruh ia ka jingiatai ne ka Panel Discussion halor ka phang ki jingdonkam ka imlang sahlang bad ka jingpynkup bor ia ki samla.
Ka Hid Foundation Shillong kala sam ruh ia ki khusnam kyrpang ne Special Awards ban ai jingithuh ia ki riewshimet kiba kynthup ia u Standwell Manih (Music) Mayous Madur (Music), u Bah Rijiedstar Khymdeit uba long u nongpathai khubor uba nyngkong eh na Nongtluh ban ioh ia ka jingithuh ne Accreditation bad u Bah Silent Kleiñ uba long u nongkhap shniuh ne napid uba nyngkong eh ha ka thain.
La pynkut ia kane ka prokram da kaba ioh ia ka jingpynbyrngia bad jingpynshongshit na ki nongrwai ka thain kiba kynthup ia u Standwell Manih, Jarrika Kharkrang, Ibanri Sengkli, Rijiedstar Khymdeit bad na u DJ Aiban.
Ka Hid Foundation Shillong kala pynpaw ka jingsngewnguh bad ai khublei kyrpang ia baroh kiba la ai jingkyrshan bad noh synniang ha kaban pynlong ia kane ka tamasa kaba jop.
