Shillong, Lber 10: Ka Monolith Festival, ka prokram jong ka Khasi Hills Autonomous District Council bad ka Meghalaya Tourism kaba thmu ban pyni nam ia ka kolshor ba riewpsah jong ka Jaidbynriew Khasi, kala kut noh ha ka sngi Saitjain.
U Myntri Rangbah ka Jylla Conrad K Sangma bad u Myntri kam jngohkai Bah Paul Lyngdoh kila pynshongkun ia kane ka tamasa ha ka jingiadonlang u CEM ka KHADC Bah Pyniaid Sing Syiem lem bad kiwei kiwei ki MDC.
Appreciate that KHADC organised the event in collaboration with Meghalaya Tourism to showcase the culture of the Khasi tribe to the rest of the world.@Indiatourismno1 @tourismgoi @meghtourism pic.twitter.com/bM0hABG3Gj
— Conrad K Sangma (@SangmaConrad) March 9, 2024
Kane ka tamasa ba lai sngi kala pyni nam ia ka jing bun ka kolshor jong ka Jaidbynriew Khasi bad ki jingleh tynrai bapher bapher, ka put ka tem, ka shad ka mastieh bad ka bam ka dih nala tynrai ha Khasi Heritage Village, Mawphlang, kaba jngai kumba 25 Km na Shillong.
Haba kren ha ka jingialang ha ryngkat bad ka ai nuksa ia ki arngut ki nongdie shana ha kane ka tamasa, u Conrad K Sangma ula ong, “Ka long kaba ai mynsiem ban iohi ba ka don ka jingiadie kumba leh kine ki arngut ki samla shynrang bad nga sngewsarong ban iohi ba kine ki trei ban kamai jakpoh. Kane ka tamasa ka wanrah ia kiba bun ki bynta ha kaba iadei bad ka kolshor u Khasi ha ki liang ki bapher bapher la kadei ha ka liang ka tem ka put, ka rwai ka siaw, ki jaiñ tynrai, ki jingbam tynrai, ka shad bad kiwei kiwei kiba iadei bad ka kolshor”.
Ula ong, ba kane ka jaka kam dei ban pynlong tang ia ka Monolith Festival bad ula kyntu ia baroh kiba don bynta ba kidei ban pynlong ïew man la ka sngi ha kane ka jaka kaba don 8 akar da kaba pyninam ia ka bam, ki marrep tynrai, ki sop, ki jaiñ tynrai bad kumjuh ruh ban pyninam kyrpang ia ka jingriewspah ka kolshor bad ka jingdon jingem ka jaidbynriew.
U Myntri Rangbah ula pynthikna ruh ba ka sorkar kan ai jingkyrshan bad ula iaroh ia ki District Council ha ka jylla ha ka jingiaid lynti thymmai ka jongki haba kila ngam jylliew ha kaba iadei bad ki kam wad bniah, ia kaba ka sorkar jylla kala sdang naduh une u snem bad kala ai mar T.50 Lak ia ki District Council ban leh iaka Research ne ban wad bniah.
“Kane ka song tyngka kan iai kiew man la u snem, khnang ba ki District Council kin lah ban sdang ia ka jingwad bniah ha ki liang ki bapher bapher, la kadei ha ka thoh ka tar, ka jingring video ne kiwei kiwei ki lad ban buh rekod ia ka kolshor kyrpang jong ki jaidbynriew bapher bapher ha ka jylla Meghalaya” ong u Myntri Rangbah.
Ula pynbna ruh ia ka CM Research Scholarship Program ia kaba la lamkhmat da u Myntri ka tnad Arts & Culture Bah Paul Lyngdoh ha kaba ka sorkar jylla kan kyrshan kumba 50 ngut ki nongwad bniah haduh T.3 Lak ia kawei ka jingwad bniah ne Research/Scholar ba kin wad bniah ha kaba iadei bad ka kolshor bad ka histori jong ka jylla.
Ka jingjied kan long lyngba ka jingthaw ia ka Committee kaban khmih bniah ia ki nongaplai kiba dei hok ban ioh.
U Bah Paul Lyngdoh, ula ong, ba ka tamasa kaba kum ka Monolith Festival kaba wanrah lang ym tang ia ka jaidbynriew Khasi hynrei ka pyniatylli bad pynpawnam ia ka jinglong tynrai jong u paid Khasi sha ka pyrthei baroh kawei.
“Nga ai khublei ia ka jingshimkhia ban pynlong ia kane ka tamasa bad nga kyrshan iaka jingangnud jong ka KHADC ban kyntiew iaka kolshor u Khasi ha ka liang ka khyndew ka shyiap, ka ktien ka thylliej bad ka jingai jait kiba long ki 3 tylli ki mawbyrsiew jong ka imlang sahlang ia kaba lah ba ai da ka jingkhlain bad jingsngewsarong sha ki pateng ban dang wan” ong u Bah Paul.
