Shillong, Risaw 05: Ka jinglehniam Durga Puja kaba 5 sngi kala kut noh hynne ka sngi Balang ha kaba da ki spah ngut ki riewngeit Hindu ha nongbah Shillong kila iashimbynta haka jingleit bret Bleithaw ha Wah umkhrah.
Kane ka jingbret Bleithaw kala sdang naduh ka por mynstep ha kaba ki riewngeit Hindu na ki Puja Pandal bapher bapher jong ka nongbah Shillong kila mih na la ki Puja Pandal bad iaid kjat ban pyndep iaka jingleit bret Blei.
Ki nongialam jong ka Central Puja Committee, Meghalaya ki iathuh ba mynta u snem, ki don 257 tylli ki Puja Mandal Committee ha ka jylla Meghalaya bad tang ha nongbah Shillong ki don 65 tylli bad kin don kumba 15 tylli ki jaka bret blei ha ka jylla baroh kawei.
Kane ka jinglehniam kaba san sngi ka la iaid beit iaid ryntih bad ki bor pyniaid distrik kila pynjur ia ka jingpahara ha kylleng ki jaka ban pynthikna ba kan ym mih kano kano ka huri hura.
Lah ban ong, kane ka jingrakhe mynta u snem ka long kaba heh khamtam ha kine ki ar snem kiba la leit kala don ka jingpyrkhing namar ka jingsaphriang ka khlam COVID-19.
