Shillong Risaw 02: Ki paid riewngeit Hindu kiba sah ha kylleng ka nongbah Shillong ha ka sngi Palei kila pynkut noh ia ka lehniam Durga Puja da kaba pyndep iaka jingpynngam um ne ka Bret Blei hapoh Wahumkhrah hapdeng u slap uba jur.
Kane ka jingleh niam kaba 5 sngi lynter, kala sdang naduh ka 28 tarik u Nailur bad la pynkut noh ia ka ha ka 2 tarik u bnai Risaw bad la pynkut ia ka, da kaba leit pynngam noh ia kine ki Bleithaw ha ki wah kiba don ha nongbah SHillong bad ha kylleng ki bynta jong ka jylla Meghalaya.
Kane ka jingbret Bleithaw kala sdang naduh ka por mynstep ha kaba ki riewngeit Hindu ha nongbah Shillong, wat hapdneg ka jingslap bad ka jingbeh ka jingdait thah, kila ia mih ryntih da ka jingkmen bad jingshongshit na la ki Puja Pandal ban synran ia ki kali kiba kit iaka Bleithaw haduh ban da poi ha Wahumkhrah, Polo ha kaba la pyndep ia ka jingpynngam ne jingbret ia ki Bleithaw ha katei ka Wah.
Kane ka jinglehniam kaba 5 sngi kala long kaba iaid beit iaid ryntih bad la pynjur ia ka jingpahara ha kylleng ki jaka ban pynthikna ba kan ym don kano kano ka jingshah pynthud ne ban mih kano kano ka huri hura.
Mynta ka kynti kila don kumba 70 tylli ki Puja Mandal Committee ha nongbah Shillong kiba la iashimbynta haka jingpynngam ne bret bleithaw ha Wah Umkhrah kaba kynthup lang ia ki katto katne ki kynhun shimet.
