Nongstoiñ, Risaw 27: Ka jingai jinghikai ba ar taiew jong ka APPDA Mitra Volunteer phase ba 3 kaba hap hapoh ka APPDA Mitra Scheme jong ka National Disaster Management Authority (NDMA), kaba la plie pyrda myn ha ka 11 tarik bnai Risaw 2022, la pynhap pyrda mynta ka sngi ka 27 tarik u risaw 2022 ha Nongstoiñ College.
Ha kane ka jingai jinghikai la wan ban ïa shim bynta da ki Volunteer ka NSS, NCC bad NYK jong ka Nongstoiñ College bad St Francis Diesis College Seijlieh.
Haba ai jing kren ha ka jingialang, u bah H.K Thabah ADC bad CEO DDMA, Nongstoiñ u la ong, “Ka syrnod ba phi la ïoh lyngba kane ka training ym ba kan ai jingmyntoi tang ban ïarap ïa ki lanot ha kano kano ka jingshah lynshop jong ka mariang, hynrei kan ai jingmyntoi ruh ha ka wad kam wad jam khamtam kum ha ka tnad shipai bad pulit”.
“Lyngba kane ka training ba phi la ïoh, phi dei ban pyndonkam hok da kaba pyni ïa ki sap kumno ban shna hi ïa kino kino ki tïar ai jingïarap kum ki jacket ba phong haba pyndonkam ha ki um, ki tiar ai jingïarap haba pluh ïing lane wan u jumai bad kiwei kiwei” ula ong.
“Nga kyntu ba lyngba kane ka training kaba ki la pyndep, phin ai ruh ka jinghikai lem ïa ki para khynnah skul bad college, kiba ha ïing ha sem, ïa ki para nongshong shnong bad ïa ka District hi baroh kawei. Lada jia ba wan kino kino ki jinglynshop jong ka mariang ka District hi kan sa donkam bad ym dei ban rieh”, u la bynrap.
Kane ka jingai jinghikai ka kynthup ïa ka life saving skills, first aid, search and rescue bad flood rescue. Kiwei kiba la ai jingkren ki long u bah T.Tynsong SI Civil Defence & Home Guard Nongstoiñ ba la pynïaid ïa ka programme bad bah J Mawthoh DDMO ba la ai khublei pynwai.
