Shillong, Nailar 3 : Ka tamasa Sohtrun ka Jylla Meghalaya bala tip kum ka Meghalaya Pineapple Festival 2025 kaba lai, kala kut noh ha ka Sngi U Blei ha Dilli Hat, INA, New Delhi, da ka jingjop kaba khraw kaba la paw na ka jinglah ban pyniaid iew ia bun bah u soh bad ka jingiatehlok ban pyniaid iew ha kylleng ka Ri.
Palat 15.4 metric ton u sohtrun la lah ban pyniaid iew ha kane ka tamasa ba lai sngi, kaba pynskhem ia ka Meghalaya kum ka nongpynmih ia u sohtrun uba shngaim bad ba thiang tam hapoh ka Ri India bad u bym shim la pyndonkam ia kino kino ki dawai dashin.
Ia katei ka tamasa la plie da u Shivraj Singh Chouhan u Myntri ka sorkar pdeng uba khmih ia ka Tnad Agriculture & Rural Development ryngkat bad u Myntri Rangbah ka jylla u Conrad K. Sangma bad kane ka tamasa kala khring ia ki hajar ngut ki briew, ki nongthied na kylleng ka ri bad ki kynhun kiba kwah ban iatreilang ban pyniaid ia u sohtrun.
U Myntri ka Sorkar Pdeng ula iaroh ia ka jinglong jingman u sohtrun ka Meghalaya bad ula pynthikna ba ka sorkar pdeng kan ai ia ka jingkyrshan kaba pura bad ka ong, “Lada ka don ka bneng hapoh ka khyndew, kata kan dei ha Meghalaya. Ka sorkar pdeng bad ka Ministry of Agriculture kan ieng ryngkat beit ki nongrep jong ka jylla”.
U Conrad K. Sangma ruh ula iaroh ia ki nongrep halor ka kamram ka jongki ha kaban pynpoi shabar ri ia ki jingthung kaba ki pynmih, bad ula ong “Ki sohtrun ki jong ngi kidei kiba la ieid ym tang namar ka jingthiang ba kyrpang hynrei kadei ruh namar ba la thung ia ki khlem da pyndonkam dawai dashin. Kane ka tamasa ka pyni ia ka jingiohi jngai ka jong ngi ban pynkup bor ia ka imlang sahlang ha ki thain nongkyndong bad ban noh synniang sha ka thong ban kynjoh ka ioh ka kot kaba USD 16 billion hapoh u snem 2032.”
Ka bynta kaba kongsan, kadei halor ka jingiasoi ia ka soskular ne ka MoU bad ka Reliance Fresh, Amazon Karigar bad Blue Tokai Coffee Roasters, da ka jingthmu ban thied, ban pyndie bad ban kit ban bah ia ki marrep.
Ka tamasa kala pyninam ruh ia ki jingleh kiba long thymmai ha kaba iadei bad ka kam rep kam riang, ka jingsengkam da ki kynthei bad ka sap ka phong halor ka kolshor.
Kawei na ki nongsengkam ka Reena Nongrum na Ri Bhoi, kala pynpaw shaphang ka jingiaid lynti ka jongka ba na ka kam suhjain ban longtrai syndon ia ka Food Processing Unit bad mynta kala shalan ia ki mar kiba la pynmih lyngba u sohtrun ha kylleng ka ri India.
Ha ka dukna kaba la pyninam da ka, la buh ia ki sohtrun tyrkhong, mit-mit bad u sying uba la pynkylla powdar, ia kaba kala ioh ia ka jingiaroh na ki briew kiba la wan ban jngoh.
Nalor kane la pynlong ruh ia ka jingpyninam ia ka kolshor hapoh jongka Chief Minister’s Meghalaya Grassroots Music Project (CM-MGMP) kaba la nang pynshongshit ia kane ka tamasa da ka jingshimbynta ki kynhun kiba kynthup ia ka The LYNX, Elena and the Band bad Chegim Durama kiba la pynbyrngia ia ki paidbah ha Dilli Haat bad ha India Gate.
