Shillong Iaiong 10: Ka Shad Suk Mynsiem ne ka Dance of the Joyous Heart, kaba la pynlong daka Seng Khasi Kmie kala kut noh hynne ka Sngi Nyngkong jong ka taiew, ha kaba kila don 1451 ngut ki nongshad kiba la iashimbynta.
Kane ka Shad kala sdang ha ka Sngi Saitjain ia kaba la tip kum ka Shad Nohkjat bad la pynkut noh haka Lah Sngi U Blei ia kane ka shad tynrai u Khasi kaba shisien shi snem ha Madan Weiking, Jaiaw.
Ha kane ka shad, kila don 1451 ngut ki nongshad kiba kynthup ia 727 ngut ki Rangkynsai bad 724 ngut ki Theisotti.
Ha ka sngi kut la sdang ïa ka Shad da ka jingtem ïa ka sur jong ka ksing lum paid ha phyllaw ka ïing Seng ha Mawkhar bad la pynbud sa ka nguh ka dem bad hadien kane, ki nongialam jong ka Seng Khasi ryngkat bad ki nongshad kila mih na ïing seng ban hiar sha ka Lympung Shad ha Weiking.
Ynda la poi ha Weiking ki nongshad, ki duhalia kila iaid lai sien lai wat ia ka lympung bad hadien kane, ki nongialam ka Seng Khasi kila pynlong ia ka nguh ka dem ha u Blei Trai Kynrad bad hadien bala pyndep iaka jinglehniam lehrukom, ki Theisotti, ki Rangkynsai bad ki heprit kila sdang ban shad ha ryngkat ka jingwan sakhi da ki hajar ngut ki paidbah na kylleng ki jaka.
Ia kane ka shad tynrai u Khasi la wan ruh ban sakhi da u Lat ka jylla u Phagu Chauhan, u Symbud Myntri Rangbah ka jylla u Bah Prestone Tynsong, u CEM ka KHADC u Bah TW Chyne, u MLA ka Mawlai u Bah B Marbaniang, ki heh sorkar bad kiwei kiwei.
Ka Shad Suk Mynsiem kadei ka Shad tynrai u khun Khasi Khara ban ainguh ia u Blei Trai Kynrad uba la theh ia ki jingkyrkhu ha ka rep ka riang, ka koit ka khiah, ka ioh ka kot bad ban shongsuk shongsain bad kadei ruh ka Shad kum shi bynta ban pynneh pynsah iaka jingriewspah ka kolshor u Khasi.
Ha ka por mynmiet, ki nongialam ka Seng Khasi ryngkat bad ki nongshad bad ki duhalia kila mih na lympung Weiking ban wan kiew biang sha ka iing seng kaba don ha Mawkhar ha kaba la pynkut syndon ia kane ka Shad tynrai u Khasi.
