Shillong, Naitung 2 : Ka jingiakhun hapdeng ka Malki Sport Club bad ka Rangdajied Sports Club hynne ka sngi hapoh ka Shillong Premiere Leaque kala kut ha ka jingiakhaid khlem da don mano mano ruh ba lah ban pynkhih ia ka kol.
Kane kadei ka sien kaba nyngkong ba ka jingiakhun kan kut ha ka jingiakhaid da mar 0-0 kol, khamtam hadien ba u rangialehkai ka Malki u March Marbaniang u la shah beh noh napdeng madan ha ka minit kaba 40 jong ka kylla step da ka jingioh red card.
Da kane ka jingiakhaid, ka Rangdajied ka la duh noh ia ka kabu ksiar ban don ha ka kyrdan kaba ar ha ka miej iakhein point.
Mynta kane ka kynhun kala ioh kamai san point na ki lai tylli ki jingiakhun kata hadien ka Ryntih kaba la ioh hynriew point bad ka Mawlai kaba lamkhmat da khyndai point. Ka Malki mynta ka don ha ka kyrdan kaba san da ki saw point, kata mar kajuh bad ka Langsning hynrei ka iapher pat ha ka jingthep kol.
Ka jingiakhun kaba bud pat pat kan long ha kane ka sngi Ba-ar hapdeng ka Nangkiew Irat pyrshah ia ka Mawkhar ha ka por 4:00 baje janmiet.
