Shillong, Nailar 11 : Ka Langsning bad ka Mawkhar ki la hap ban ia sam mar shi point ha ka jingiakhun kaba 35 jong ka Shillong Premier League kaba dei ruh ka kylla kaba ar jong katei ka lympung kaba long mynta ka sngi ha madan Third Ground, Polo.
Ha ka jingiakhun jong ka kylla kaba nyngkong, ka Langsning ka la ioh ban thep haduh 3-1 kol ha ka jingialehkai kaba long ha ka 27tarik u Naitung.
Kaba kham itynnad ha katei ka sngi kadei namar baroh ar tylli ki kol kidei kiba la ioh ban thep lyngba ka jingshut penalty, kata lyngba u Shano Tariang ha ka minit kaba 33 jong ka kylla step na ka bynta ka Langsning ha shwa ba u Lyngketlut Myrchiang un ioh ban pynphai kylla ha ka minit kaba 69. Kane kadei ka sien kaba lai ba ka Mawkhar ka la ioh ban teh lakam ia ki kynhun kiba khlain bor ha katei ka lympung, nyngkong da kaba pyniakhaid bad ka Rangdajied bad ruh bad ka Mawlai SC.
Shwa kane ka jingiakhun ka Langsning ka don ha ka kyrdan kaba ar da ki 17 point katba ka Mawkhar ka don ha trai duh da ki 2 point. Kumta lada ka Langsning ka jop, kan jin da la leh ban tam knieh tam ia ka Mawlai kaba don mynta 19 point pynban da ka jingiakhaid ka don mynta ha ka kyrdan kaba ar hi da ki 18 point katba ka Mawkhar pat ka dang neh ha kajuh ka kyrdan da ki 3 point.
Lashai ka sngi pat ka jingiakhun kan long hapdeng ka Malki kaba don ha kyrdan ba hynniew da ki 4 point pyrshah ia ka Mawlai Sports Club kaba don ha ka khlieh duh ka miej ia khein point da ki 19 point, ha ka por 4baje janmiet. Kitei ki kynhun ki la kynduh ban aireng ha ka 09tarik u Naitung ha kaba ka Mawlai ka la ioh ban pynliem haduh 4-0 kol.
