Shillong, Naiwieng 17: Kumba baroh kiei kiei kiba bha ki dei ban poi sha kaba kut, ka tamasa Cherry Blossom 2024 kaba ar sngi ruh, ka la poi noh sha kaba kut ha ka sngi Saitjain ha Madan Kurkalang ha Bhoirymbong.
Kane ka tamasa kaba ar sngi ka dei kaba paka bha ban pynlut por bad pynbyrngia ialade haba kut jong ka taiew hadien ki jingbunkam, kala pynshongshit da ki sur jingrwai kiba pynjem mynsiem bad ki jigshad kiba aibor ia u paidbah. Ka tamasa mynta u snem ka la dap da ki nongrwai ba pawnam na ka thaiñ, na kylleng ka ri India bad ha kylleng ka pyrthei kiba kynthup ïa ki kynhun rwai ba pawnam kum u Boney M, u R&B ba pawnam u Akon, u DJ R3hab, bad ka kynhun Clean Bandit kaba dang shu paw mynta.
Ka Tamasa Cherry kam long satia tang ka rynsan ia ki nongrwai kiba pawnam hynrei ka dei ruh ka rynsan ban kyrshan ia ki nongrwai bad nongput nongtem ka Jylla, kaba ai ka lad ia ki ban pynpaw nam ialade ba kin lah ban leh shibun kiei kiei ha ka jingim jong ki.
Nalor ka rwai ka siaw ka put ka tem, ka tamasa ka la tyrwa ruh sha ka pyrthei ia ki jingbam kiba phylla bad ki jingpynbyrngia kiba pynsngewtynnad bha na ka bynta ki khynnah bad ki rangbah. Kiwei pat kaba khring bha ia u paidbah ka dei ka Japan Arena- ka ba pyni ia ka kolshor, ka pateng bad ki jingbam jong ki nong Japan.
Katba ka tamasa ka dei eh kaba pynshong nongrim ha ka jingrwai bad ki jingsngewbha, man la ka sngi ka don la ka jong ka jinglong kaba kyrpang. Ka sngi kabanyngkong kan dei ka sngi ka ban pynsah jingkynmaw , ha kaba ki nongwan ki la shad bad rwai ïa ki jingrwai ba pawnam na ki snem ’80 bad ’90. Ki jingrwai jong ka Queen Sensation, ka Boney M, bad u Akon ki la pynim biang ia ki jingrwai kiba la rim.
Ha ka sngi kaba ar, ka madan kala shongshit bha bad kila shad ryngkat ryngkat bad ki sur jingrwai na u Wanbha War ba na Pynursla, bad ka kynhun tem Heavy Metal SK Korn nalor ka Kanika Kapoor, ka DJ R3hab bad ka kynhun Clean Bandit kaba la pynshongshit bha ia ki paidbah da ka jingrwai ba pawnam jong ka- ka ‘Symphony’.
Hashuwa ban kut kane ka tamasa, ki nongpyniaid kila nang pynthrang dik dik ia u paidbah da ka jingpynbna ba ia ki ticket jong ka Cherry Blossom 2025, yn sa sdang ban dienoh naduh ka 30 tarik u Nohprah.
Kaba pynshaiong ia baroh, ka dei ka jingpynbna ba u Nick Carter jong ka kynhun rwai ba pawnam bha-ka Backstreet Boys, yn wan ban rwai ha ka Cherry Blossom festival 2025.
Kane ka khubor kala pynkmen bha naba ka kynhun Backstreet Boys ka dei kawei na ki kynhun nongrwai ba pawnam bha ha nongbah Shillong.
