Shillong, Lber 4: U President ka NPP Meghalaya u Bah Prestone Tynsong ula ai burom ia u nongseng jong ka NPP u PA Sangma ha ka lyngkhuh sngi iap kaba 10 jong u bad ka pynkynmaw ba une u Speaker barim ka Lok Sabha udei uba rah shajrong ia ka nam jong ka jylla Meghalaya.
“Haba nga la leit sha New York, ki Non-Resident Indian ne NRI kiba pyniaid ia ki karkhana ki dang iakren shaphang u PA Sangma. Kila ong ba ym don mano mano kiban lah ban long kum ma u, ym don nongialam na Meghalaya kiba la kynjoh shaduh sha ka kyrdan ka jongu” la ong u Bah Prestone ha ka jingialang kynmaw burom ia u PA Sangma kaba la pynlong da ka seng NPP hynne ka sngi Balang.
“Dei na kane, ba bun na ngi, ngi lah rung sha ka NPP, ban pynthikna ba kan don ka jingbteng da ka jingkitkhlieh”.
Haba pynkynmaw shaphang u snem 2014, haba u Sangma ula shah jied biang kum u MP ka Tura, u Bah Prestone Tynsong ula ong, ba u ju leitkai ha ka por mynmiet ha ka iingsah jong u PA Sangma ha Delhi.
“Man la ka por haba nga poi ha Delhi nga ju phone ia u. Nga sah ha Meghalaya House bad u (Purno) ruh u sah hajan hi bad ha ka por 8.30–9 baje mynmiet, nga sheit leit jar-jar sha ka iingsah jongu. Wat u James Sangma ruh um tip haduh katno ngi don ia ka jingiadei kaba iajan bha” la ong u Bah Prestone.
Ula ong ba na kane ka jingiadei paralok, ki nongialam ka seng Congress kila ai da ka ‘Yellow Card’ ia u ha katei ka por.
“U PA Sangma udei uba la shah jied ha u Blei. Ula ong, ia nga “Phi long kum u para khatduh. Trei shitom bad pynthikna ia ka bha ka miat jong ki jaidbynriew riewlum na Meghalaya, ka thain shatei lammihngi bad ha ka ri baroh kawei bad dei ban ai ka jingiada kaba pura ia ki. Ha katei ka por ngam shim la sngewthuh bha bad nga lah pyrkhat ba ka jingshakri ka jong nga kan kut tang ha Meghalaya. Ula pyni ia nga ban iadonbynta ha kata ka bynta kaba don ia ka jingiohi jngai kaba iar” la iathuh u Bah Prestone.
U Bah Prestone ula banjur ba ka khubor jong u PA Sangma kadei, “Kawei ka thain shatei lammihngi, kawei ka sur ia ki jaidbynriew rit paid hapoh ka ri India” bad kane ka kala shaikdar haba ula pule ia ka riti treikam jong ka NPP ha u snem
2018.
“Ngin ym ioh shuh ia u nongialam uba khraw kum ma u. Ka pynmong ban iohi ba ki briew ki kawang maw ia ka riti treikam jong ka seng, haba kum ki rit paid ngi dei ban iada ia ka mishon kaba ula iehnoh ha ngi” ula ong bad ka pynpaw ia ka jingskhem jingmut ba hapoh ka jingialam u Conrad K Sangma, ka seng kan iai pynkhlain ia ki matti kiba la iehnoh da u PA Sangma.
Haba kynmaw burom ia la u kpa, u National Working President ka NPP bad u Myntri Kam pohiing barim ka jylla u James P.K Sangma ula ong, ba ka jingai burom kaba shisha kam dei satia tang ban iai kynmaw hynrei ban iai bteng ban buddien ia ki jingiohi jngai ki jongu.
“Ka jingiohi jngai ka jongu lyngba ka seng NPP ka don ia ka lad bad ia ka bor ban pyniaid shakhmat namar ba u mawnongrim uba skhem udei uba la dep ban buh” ong u James Sangma.
“Une u mawnongrim un ialam ia ka seng ba kan dang jam shakhmat. Mynta ngi lah kynjoh ha ki katto katne ki bynta na ka jingsdang kaba rit, ka jingsdang na ki shnong ki thaw, kaba pyni ruh ia ka jinglah kaba don hapoh ka jong ngi” ula ong.
Ula pynpaw ka jingsngewnguh ia ki nongpyniaid bad ong ba kane ka prokram ka long ban rakhe bad ban kynmaw ia ka jingim jong u PA Sangma ha ka jaka ban leh sngewsih.
Katba u Bah Prestone Tynsong, ki MLA bad kiwei kiwei ki nongkitkam ka NPP, kila bynrap da kaba ong, “Kane ka prokram kala long kaba don jingmut namar ka jingdon ryngkat ka jong phi. Na ka bynta ka iing ka sem khublei shibun. U Blei un kyrkhu ia ka NPP bad ai ka jingiohi jngai jong u PA Sangma”.
Katba u Treasurer ka NPP u Bah Daniel Thangkhiew ula pynkynmaw ba u PA Sangma u long u nongiada ia ka jinglong tynrai jongki jaidbynriew riewlum bad ia ka hok jongki Khristan.
“Nga lah leit lang bad u ha ka por ba mih ka jingiakynad ha Langpih, ngi la shong da ka kali bad leit sha ki jaka kaba la mih ka jingiakynad hapdeng ki Garo bad ki Rabha” ong u Bah Daniel Thangkhiew. “Nga ka jingshem ka jong nga shimet, udei uba la ieid da kiba bun, uba la pyni ia ka nuksa bad iakhun na ka bynta ka hok jong ki jaidbynriew riewlum tad haduh ka sngi kaba ula khald noh”.
Ula bynrap, “Ula iakhun na ka bynta ki Khristan ha kane ka ri, ula kob hapoh ka iingdorbar thawaiñ ka ri haba ki briew kila kyntait ban kubur ia ka jingshisha ba ki skul kiba la pyniaid da ki mishoneri bad ula phah da ka jingthoh sha u Myntri Rangbahduh ka ri bunsien halor ki mat kiba iadei bad ki khun shynrang bad kynthei Khristan ia kaba ki iai mad haduh mynta”.Ula ong, ha ki kynta kiba khatduh jong u PA Sangma, “U Myntri ka Sorkar Pdeng u Piyush Goyal ula khot ia ka Ambulance bad iarap ha kaban pynkit ia u PA Sangma sha hospital.”
“Ngam dei uei uei, u ban kren shaphang ka jinglong ka jongu (Purno), ka pyrthei baroh kawei ka tip, hynrei ula iengskhem tad haduh kaba kut” ula ong.
