Kut jingmut ka Sorkar ban pynkupbor ia ki samla Pule da ki kor Digital, ong u CM

Aiti u CM ia ki M-Tab sha ki samla pule ka West Garo Hills

Tura, K’lyngkot 14: U Myntri Rangbah ka jylla u Conrad K. Sangma hynne ka sngi Baar, ula sam ia ki M-Tab (learning tablets) sha ki samla pule jongka West Garo Hills ryngkat bad u Lamphang ka iingdorbar thawain ka jylla u Thomas A Sangma ha ka jingialang kaba la long ha District Auditorium, Tura.

Ka jingsam ia ki M-Tab kadei lyngba ka Chief Minister’s Student Digital Learning Scheme, kaba thmu ban kyntiew ia ka pule puthi lyngba ki kor ki bor ha ka jylla. Kane ka Tablet kadei kaba la pynrung ia ki bynta kiba kongsan kiba iadei bad ki eksam bapher bapher ha ka Higher Secondary, kiba kynthup ia ki jingkylli bapher bapher, ki jingkylli kiba la dep ban wan teng, bad ki jubab ia ki jingkylli ki bapher bapher ha ka jingiakhun ia ki eksamin bapher bapher. Ka don ruh ia ki sur, ki video, Animation bad ki 3D Graphic.

Haba kren ha ka jingialang u Myntri Rangbah ula ong ba “Kane ka tiar kab pyndonkam da ka kti kam dei satia tang ka kynja tiar teknoloji hynrei kadei ka atiar kaban pynkup bor ia ki samla. Ngi kwah ban pynthikna ba ki samla kin ioh ia ka lad ban pule bad ban don ruh ia ki tiar ba kin iakhun ia ki eksamin bapher.

“Kane ka prokram kadei ka jingpyni katno ngi don ia ka jingpyrkhat na ka bynta ka jong phi bad ban tip ruh katno ngi shaniah ha phi” la ong u Myntri Rangbah bad ka ong ba ki kor ki bor kila wanrah ia ki jingkylla ha kiba bun ki bynta ha ka jingim.

“Kane ka sorkar ka ngeit ba ha kano kano ka lynti ruh dei ban pynkhlain ia ka jingpyndonkam ia ki kor teknoloji ban pynthikna ban gin lah ban pynlong ia ka jingpule kaba don ia ka jingkylla bad kaba don jingmut, kaba sngewtynnad bad kaba sngewkmen” la ong u Myntri Rangbah.

Ula ong ba ka ‘Digital Learning’ lyngba ki sur, ki dur bad ki video, kala pynlong ia ka jingpule ban suk bad kaba sngewthuh bha.

“Ngi don ia ka jingngeit kaba skhem ba kata katba nang pyndonkam ia ka teknoloji ha ki shnong ki thaw, ki Smart Classroom, kumta ka Digital Learning kan ai jingiarap shibun ia ki samla pule ki jong ngi, hynrei ngi dei pat ban kynmaw ba ka teknoloji kadei tang kaba plie lad bad kadei kaba ailad ia phi ban pynsuk shibun ia ka rukom pule” ula ong.

Ula pyntip ruh ba ka sorkar kala shimkhia bha ban kyntiew ha ka liang jongka IT ha ka jylla, kaba kynthup iaka jingthaw ia ki IT Park ha Shillong bad Tura bad ka jingpyniaid ia u Optical Fibres.

“Ngi kyrmen ba kane ka project yn pyndep ha ki ar snem kiban wan. Ngi ngeit skhem ruh ba man la ki skul kin ioh ban pyndonkam ia u Optical Fiber. Kan shim por hynrei ka kam kala nang iaid shakhmat” la ong u Myntri Rangbah.

Ulapyntip ruh ba ka IT Park kaba la don lypa ha Shillong kala ai jingshakri ia ki briew kiba na ka ri United States of America bad ia ka dewbah Europe.

“Ki samla shynrang bad kynthei ki jong ngi na ka Meghalaya kila trei ha ki kompani AI. Kila pynbiang ia ki kompani AI ha US, Europe bad ki lad kiba la batai lypa shaphang ki jingpang ha ki marrep, ka jingbatai lypa ban slap, ka jingheh bad jingroi jong ki jingthung, ka jingdonkam ia ka um bad kiwei kiwei. Ia kitei baroh lah leh na Meghalaya, kane kadei kata ka rukom jong ka jingkylla kaba la wan ban jia” ula bynrap.

Palat 1 lak tylli ki Tablet la sam naduh u snem 2021 sha ki khynnah pule XI. Ha u 2023-24 palat 30,480 ngut ki samla pule katkum ka jinglum jingtip ka Directorate of School Education and Literacy kila iohpdiag ia ki jingmyntoi na katei ka scheme.

Ha West Garo Hills district, kumba 3000 tylli ki M-Tabs yn sa sam. A ka jingialang kaba hynne ka sngi palat 400 ngut tam ki samla pule na ki 21tylli ki jaka pule kila ioh pdiang ia ki Tablet.

Kumba 5,700 ngut ki nonghikai jong ki Higher Secondary School ha ka jylla kin sa ioh ia ki Tablet, kaban plie lad ia ki ban leh ia ka E-learning bad ka Assessment.

Ka Vidya Samiksha Kendra, kadei ka app pule kaba la pynwandur da ka tnad Information and Technology jong ka sorkar jylla ban khmih ia ka jingmih na ka jingioh jinghikai bad ka iarap ruh ia ki nonghikai ban peit bad khmih bniah ia kaei kab ki samla pule ki lah leh.