Palat 300 ngut ioh khusnam ki samla pule da ka Laptop
Shillong, Kyllalyngkot 20: U Myntri Rangbah ka jylla u Conrad K. Sangma hynne ka sngi nyngkong, ula iengskhem halor ka jingkular jong ka sorkar jylla ban buh hakhmat eh ia ka jingdonkam ki samla ka jylla shim ia kino kino ki rai.
Haba kren ha ka jingsam ia ka khusnam Meghalaya IT ia ki samla kiba wan shakhmat ha ki jingpule Class X bad XII da ki Laptop, u Myntri Rangbah ula pynpaw ia ka jingkongsan ban pynkup bor ia ki samla ban ialam ia ka jylla ba kan kiew irat bad ban kyntiew ia ka roi ka par.
“Ka sorkar ka pynleit jingmut bha na ka bynta ki samla ka jylla” ula ong.
“Ki samla ki don hapdeng eh jong ka jingshim rai ka jong ngi bad kaei kaei baroh kaba ngi leh kadei kaba la leh na ka bynta ka bha ka miat jong ki samla. Ki prokram ne ki polisi treikam jong ka sorkar ki dei kiba la pynwandur ban ai jing shakri bad ban pynbiang ia ki jingdonkam bad ia ki jingangnud jong ki samla”.
Haba kren shaphang ka jingshimkhia jong ka sorkar ban pynbiang ia ki jaka ialehkai, u Conrad ula ong, “Ngi kwah ban saindur ia ka sap ka phong jong ki samla, khnang ba ngin pynkhreh ia ki ba kin lah ban iakhun ha ki rynsan haka kyrdan National ne International kynthup ia ka Olympics.”
“Kane ka sienjam kadei shibynta jong ka buit treikam jong ka sorkar ban kyntiew ia ka roi ka par bad ban pynkup bor ia ki samla ba kin lah ban pyndonkam ia ka sap kaba ki don. Ngi lah buh ia u maw nongrim naka bynta ka lawei jong ka jylla bad ka ri” ula ong.
U Myntri Rangbah ula ai khublei ia ki 300 ngut tam ki samla pule kiba la wan shakhmat ha ki jingpule ha ka samoi pule jong u snem 2023-24 kiba la ioh pdiang ia ka khusnam ha ka jingialang kaba la long ha Soso Tham Auditorium Shillong.
Ula kyntu ia ki khynnah pule ba kidei ban long kiba tista bad kiba don akor ha ka jingim ka jongki.
“Ka khusnam ka dei ka jingai jingithuh jong ka sorkar ia ka jingjop ka jong phi. Kane kadei tang ka jingsdang jong ka jingiaid lynti ha ka jingim ka jong phi. Ngi ngeit skhem ba phin bteng ban trei shitom shuh shuh bad ban ai mynsiem ia kiwei ruh” ula ong.
“Ka sorkar ka treikam da kaba iaid katkum ki scheme, ha kaba ngi pynleit jingmut ha kaban pyntreikam ia ki prokram kum ka PMGSY, JJM bad Farmers Schemes, hynrei ha katei ka jingiaid lynti, ngi klet noh ba ka jingthmu jong kitei ki scheme ka long ban wanrah ia ka jingkylla haka jingim briew” la ong u Myntri Rangbah.
Ula ong, ba mynta ka sorkar kala sdang ban kynriah noh ha ka rukom pynleit jingmut ka jongka na ka jingpyntreikam sha ka jingpynmih, da kaba buh ha khmat ia ka jingiohnong bad ia ki jingkylla kiba bha lyngba ki prokram kaba ki lah ban ai sha ki paidbah.
