Nongpoh, Nailur 07 : Ki Pulit ka Ri-Bhoi ha ka sngi Balang, kila ioh ban kurup ia u droks ba shongdor T. 1.3 klur bad iohkem ruh ia uwei u briew ba khaii ia une u drok.
Ia une u nongkhaii droks la ioh kem hynnin ka miet na kawei ka kali Tourist ML05-T-6149 katba u dang thmu ban wan kiew sha Nongbah Shillong.
Na une u briew uba kyrteng u Rahul Nazary ba na Madanrting, la ioh ban kurup haduh 10 tylli ki synduk sabon ba thep ia u droks heroin ba khia kumba 135.64 gram.
Katkum ka jingtip ba la iohlum, ki pulit ki la ioh khubor halor ka jingthmu pynpoi ia u drok heroine sha nongbah Shillong na Guwahati kumta marmar ki pulit ka Byrnihat Police Outpost ki la pynapshrip ban pynlong ia ka jingtalasi bad dei ha ka por 11 baje eiei mynmiet la ioh ban bat ia kane ka kali tourist ba shong une u nongkhaii.
Ki Pulit kila register case ia une u briew ha Byrnihat Police Station hapoh ki kyndon jong ka NDPS Act. Ka jingtohkit mynta kala iaid shakhmat.
