Shillong, Jymmang 3: Ki pulit ka Nongpoh mynta ka sngi Saitjain kila ioh ban kurup ia shibun ka umphniang petrol ha ka jingkhynra ha ki dukan ha Quninie, Ri-Bhoi district, halor ka jingkynnoh ba ki die beain ia ka petrol bad diesel ha ka dor kaba rem.
Ia kane ka jingkhynra la leh da ki Pulit ka Nongpoh Police Station ha ka jingsynran lang bad u secretary ka shnong bad ki dkhot ka Village Defence Party (VDP). Ka dukan ba long trai da u Bah Omiwell Marbaniang na Shangbangla, la lap ba u la buh lypa kumba 101 litres kae petrol bad 84 litres ka diesel.
Halor kane, u trai dukan u la kam ba u la thied ia kine ki umphniang na ki petrol pump kiba don marjan hynrei na ka liang ki pulit kila suba ba kine ki umphniang ki lah ban dei ba la tuh na ki mobile towers ne na kiwei pat ki jaka bad halor kane ki pulit ki dang pynlong ia ka jingtohkit halor kine ki umphniang ba la ioh kurup.
Na ka liang ki pulit kila maham pyrshah ia ki petrol pump kiba die ha ki jerry cans lane bilor, namar lah ban shah pyndonkam bakla ha ki kam beain bapher bapher.
Shuh shuh ki Pulit ka Nongpoh kila pynkynmaw ia ki paidbah ba ka jingdie umphniang khlem da don ki licence ba biang ki lah ban ngat ha ka jingshah pynshitom.
