Tura, June 24: Ka kynhun ki pulit jong ka Williamnagar bad Rongjeng Police Station ha East Garo Hills District kala pynlong ia ka jingkhynra bad kala ioh kuru pia ki tiar siat dang step phyrngab hynne ka sngi ba ar.
Haba shimkhia mardor ia ka jingioh ia ki jingtip kiba thikna, ia kane ka jingkhynra la ialam da u Additional Superintendent of Police ka Williamnagar bad la sdang ia ka jingkhynra ha ka por 11:30 mynmiet ha ka sngi Nyngkong bad la leit rung shapoh ki khlaw kiba rben kaba don hajan ka shnong Chikama kaba hap hapoh jong ka Rongjeng Police Station.
Ha ka por 2 baje mynstep, kane ka kynhun ki pulit kala lap ia bun bah ki tiar siat kiba la buhrieh hapoh katei ka khlaw. Ki tiar kiba la ioh kurup ki kynthup ia kawei ka pistol kaba la shna hi, 212 tylli ki kuli AK, 22 tylli ki kuli kiba la suba kidei kiba lah ban siat ia ki liengsuin, 13 tylli ki kuli ban siat ia ki liengsuin kiba khlem ki Pellets, 11 tylli ki Pellets bad 52 tylli ki kuli jongka 6.5 mm.
Ia kitei baroh la ioh kurup na katei ka jaka ha ka jingdonlang jong ki nongshakhi. Ki bor kiba dei khmih kila pynthikna ba ka jingtohkit kan dang iaid shakhmat ban lap ia ka jingwan poi jong kine ki tiar siat bad kiba donbynta bad kine ki tiar siat.
U Superintendent of Police (SP) Bah S.A. Rynjah ula kyntu ia ki paidbah ba kin long kiba husiar bad kiba peitngor bad ban kyrshan ia ki bor khmih jong ka ain na ka bynta ban iada ia ka thain.
