Shillong Rymphang 21: Ki Pulit ka East Jaintia Hills kila pynjur ha kaban tehlakam ia ka jingtih bad jingkhaii dewiong be-aiñ bad kila ioh bat haduh 12 tylli ki trok kiba kit be-aiñ ia u dewiong hynin ka miet.
“Ha ka miet jong ka sngi Thohdieng bad Sngi Saitjain, 12 tylli ki trok kiba kit ia u dewiong kila shah kurup noh ha ki pulit jong ka district” ong u Superintendent of Police ka East Jaintia Hills, Pankaj Kumar Rasgania.
Ula ong, ba kane ka jingkurup ka dei kaba la leh ha ka jingkhynra ia ka jingtih bad khaii dewiong beain, kaba la lam sha ka jingkem ia 22 ngut ki briew, ka jingrejistar ia ki 94 tylli ki ejahar bad ka jingioh kurup haduh 17,322 metric ton u dewiong bad 25.5 kg ki tiar pynbthei.
Kane ka jingkhynra napahang ia ka jingtih dewiong be-aiñ kadei ka jingbteng hadien ba kala don ka jingjia ha ka shnong Mynsngat-Thangsko ha kaba kala don ka jingbthei ha ka par dewiong kaba la shim ia ka jingim jong ki 31 ngut ki nongbylla.
