Nongstoiñ, Rymphang 21: Ka ding kaba klang bha kala bam duh ïa ka ïing jong I kong Sara Ryntong na ka shnong Nongtraw West Khasi Hills District hynne ka Sngi Saitjain ha ka por kumba 4 baje mynstep.
Ki tyllong khubor ki ïathuh ba kane ka jingjia ka la jia ha ka por ba baroh dkhot jong ka ïing ki dang ïoh thiah, ha kaba ka ding ka la sdang ban klang na kamra shet.
Hadien ba ki la ïoh sngew ïa ka jingsawa jong ka jingpluh, ki la mih ban pyrta jingïarap na ki para marjan, kiba la pyrshang ban ai jingïarap mardor, hynrei ka ding kaba la klang bha kala bam duh lut khait ïa ki jingdon jingem baroh.
Ki tiar ba la duh noh ki long naduh u khaw, u kba, ki khiew ki pliang, ki jaiñ ki nep, kumjuh ruh ka pisa, ha kaba ka jingduhnong la antad ba ka la kot da ki lak tyngka.
Ha kane ka jingjia pluh ding, ym shym la don kano kano ka jingjia ba sngewsih ïa ki mynsiem briew.
