Shillong Nohprah 02: Ki shipai BSF ha ka sngi Thohdieng kila ioh ban bat ia kawei ka trok kaba la buhrieh ia ka shini da kaba tap da u shyiap, ha ka jingkhynra bala pynlong ha khappud ka East Jaintia Hills.
Ki BSF ki pyntip ba kane ka trok ka dei kaba kam ba ka kit ia ki mar jong ka NBCC hynrei ha ka jingtalasi, la lap pynban ia shibun bah ka shini kaba la buhrieh bad tap da u shyiap da ka jingthmu ban khaii sha Bangladesh. Kane ka trok ka dei kaba don u nombor ML04-C-5133.
Ki BSF kila kem noh ia u nongniah jong kane ka trok bad la aiti sha ki Pulit ba kin leh ia kaba donkam.
Ha kawei pat ka jingkhynra, ki BSF kila ioh kurup ia ki mar ki mata bad ki jaiñ ki nep kiba shongdor T.28 Lak tam ia kabala thmu ban khaïï be-aiñ sha ri Bangladesh.
Ia kitei ki mar ki mata kiba la ioh kurup ryngkat bad uba la shah kem, la aiti noh ha ki pulit jong ka Umkiang ba kin leh ia kaba donkam.
