Shillong Rymphang 10: U Chief Electoral Officer (CEO) ka jylla Bah Frederick Kharkongor ula pyntip ba ki kynhun peitngor jong ka tnad Election kila ioh ban kurup ia ka pisa, ki jingai sngewbha bad ki jingdih pynbuaid kiba shongdor haduh T.52.65 Klur na kylleng ki District ka Jylla.
U Bah Kharkongor ula iathuh ba ki kynhun peitngor kila treikam borbah ha kaban peit bad ban tehlakam iaka jingpynbeij ne jingpynngop iaki nongthep vote da kaba sam iaka pisa, ki jingai sngewbha, kyiad, drug ne kino kino ki jingdih pynbuaid.
Ula iathuh ba naduh ka sngi ba la pynbna paidbah iaka tarik elekshon ne ka jingpyntreikam iaka Model Code of Conduct haduh ka 7 tarik u Rymphang, ki kynhun peitngor jong ka tnad Election kila ioh ban kurup haduh T.52.65 Klur tyngka kaba kynthup iaka pisa, ka kyiad, ki jingai sngew bha bad ki jingdih pynbuaid.
U CEO ula ong, ka jingkurup kaba bun eh ka dei na u drug uba la shongdor T.29 klur tam.
Ha kaba iadei bad ka jingud jingnam jong ki paidbah ba ka jingtalasi kala jur shaba palat, kaba la pynthud ruh iaka leit ka wan jong ki paidbah kiba lui lui, naka liang u CEO ula kyntu ia ki paidbah ba kin long kiba iai shah haduh ka 27 tarik u Rymphang.
Ula ong ka jingpynjur iaka jingtalasi ha kylleng ki jaka kadei namar ba ka don ka jingpyndonkam iaka pisa bad iaki jingdih pynbuaid ha ka por elekshon hynrei ula ong pat ba dei lyngba ka jingdon jong ka jingtalasi, la lah ban ioh kurup iaka pisa bad ia u drug bad kane kala iarap shibun ban tehlakam ia ki kam sniew haka jylla.
Haba kylli haduh katno klur ka tnad Election kan pynlut naka bynta ban pynlong iaka MLA Election 2023 ha ka jylla, u Bah FR Kharkongor ula ong ka jingpynlut mynta ka kynti kan kham bun namar bala nang pynkha shuh shuh ia ki jaka thep vote bad wat ki pulit kiban pahara haka por elekshon kiba wan na kiwei pat ki jylla ruh kila wan poi dang kloi sha ka jylla.
U CEO ula ong, ka tnad Election haduh mynta kam pat dep ban khein ban diah katno kala pynlut hynrei kala jan kot pat sha ka T.40 klur hynrei kin dang khein shuh bad yn sa ioh iaka jingkhein kaba thikna halor ka jingpynlut haka jingpynlong iaka elekshon haka jylla.
